O soo se faamoemoe lava na amataina, e iai foi sona mutaaga poo se aso ma se taimi na tuupoina e faatini i ai lea faamoemoe. Ma o taimi fiafia na, o taimi o lagona faafetai ma lagona o le faamalo.
E faapena lagoa na iai i le Aso Sa, aso 13 Tesema, lea sa faamaeaina ai le tausaga faaleaoaoga a le aoga Tusi Paia a le Harbour Praise Church i Magele i se sauniga o le faauuga, sa faauuina ai nisi o tamafanau a le Ekalesia sa aoaoina ai.
Ua tolu nei tausaga talu ona tatalaina lenei aoga Tusi Paia i le gagana Samoa, ma o se lala o le kolisi tele o le Alfacrusis Bible College i Penrose.
E toalima i latou ua tausaga tolu, ma sa faamanuiaina i le faailoga o le “Diploma in Christian Leadership”, ae toavalu i latou ua faaiuina le tausaga muamua i le faailoga o le “Certificate in Sure Foundation.”
O le susuga lava i le faiaoga o le aoga, Ps. Poni Fonoti sa ia taitaia le sauniga lotu, a o le tauaaoina o faailoga ma le laugaina o le Upu a le Atua sa feagai lea ma le susuga a le alii pule o le Kolisi autu i le gagana Peretania, o le Alfacrusis Bible College i Penrose, le susuga ia Dr. Jack Zoutenbier.
Sa lagolagosua le susuga a le faafeagaiga ia Ps. Eric Toomata ma le susuga i le aoao ia Saimasi Robertson mo talosaga ma upu faaperofetaga mo ē ua faauuina lo latou taumafai.
O le susuga ia Ps. Toomata o le faafeagaiga o le ekalesia a le Emanuelu i Papatoetoe, ma sa auai faatasi ma le mamalu o le ekalesia mai Papatoetoe e molimauina le a‘e ma le manuia i fanua o faiva sa alo atu i ai se tasi o tamafanau a le ekalesia, le susuga ia Lama Robertson lea na faauuina ai i le au tausaga tolu.
Na maea le sauniga lotu, ona alo ane lea i se taumafataga tele sa saunia lava e ekalesia e lua auā le taliina o le sua i le mamalu o le au valaaulia, ae faapea foi aiga, uo ma e masani sa latou molimauina lenei faamoemoe. Tau ina ia alofa le Atua ma faamanuia i fanau ua faaiuina lo latou taumafai, ma ia aoga o latou soifua mo le finagalo o le Atua i le lumanai.
Faamatalaga na tuuina mai
