Maoae le faatinoga o le Tala o le Kerisimasi e fanauiti

A oo ina malamalama le fanauiti i le uiga ma le mafuaaga o le faatinoina o le tala i le fanau mai o le pepe o Iesu i le fale o manu, ona faigofie ai lea ona faataunuu e ala i lo latou fiafia ma sagisagi e faatino le tala e tau atu ai i o latou matua ma aiga aemaise i latou uma na aumai mai e maimoa ma molimauina le galuega fita sa feagai ma faiaoga, aemaise lava i nai alo ma fanau o le Aoga Amata a St Peter Chanel o Otara o le Aso Lulu o le vaiaso na tea nei.
O se vaaiga na maitauina ai le loimata maligi o le fiafia, o le agaga faagaeetia, o le loto faafetai ma le mitamita e ala i le vaai atu i le faatinoga e le fanauiti lea i lalo ifo o le lima tausaga o le tala lenei i le fanau mai o lo tatou faaola o Iesu. Na amata lenei sauniga matagofie e le Afioga Patele Peter Brown ma na fesiligia ai le fanau e uiga i le latou faatinoina o lenei tala.
E lei tuumamaina foi e le fanauiti le tali atu ma le mautinoa lelei ua malamalama ma iloa le talaaga o le faamanatuina o le aso fanau o Iesu.
E ese le matagofie o le faatinoga o le tala e le fanau aua e fai o le manino o le tautala a o le laumata fiafia na vaaia e matua ma na faapena ai lava ona vaaia le fiafia tele o le fanau a o alo atu mo le latou faafiafiaga i le latou polokalame o le Kerisimasi.
Na tulaga ese foi le vaaiga aua na ese foi le faatinoga e le fanau o le tala i le fanau mai o Iesu i lenei tausaga.
E puupuu ae na matua pai atu lava i lagona o matua le uiga o le faamanatuina o le fanau mai o Iesu.
Na maea lea ona sosoo foi lea ma pesepesga o le Kerisimasi, sosoo ai loa ma le faauuga faapitoa na faia mo le sefulu ma le tasi o fanau ua tai lima nei o latou tausaga sa aooga i le aoga amata a St Peter Chanel i lenei tausaga.
E manaia tele lea fuafuaga ma lea faatatau e faamalosia ai le loto fiafia o le fanau i le ola aoaoina ma le faatauaina o le auai i totonu o aoga amata, aemaise o le fiafia o fanau o lea ua sauni atu ai mo le sitepu poo le laasaga lona lua o le ola aoaoina e agai atu ai i aoga tulagalua.
O se aso foi o le loimata maligi ona o se tasi o faiaoga ua loa lana tautua i totonu o lenei aoga le susuga ia Taigalu Ah-ki ina ua faalauiloa lona faamavae ma lana galuega, ae sauni atu mo le tauaveina o se tasi o aoga amata fou i Weymontly Primary School.
O aga lava nei o le faagasologa o soo se galuega, aua a oo ina lava sauni mo se isi laasaga, ona faapena lava lea ona fegasoloai le aufaigaluega e tusa ma le manao ma le agavaa mo le tauiviga o le agai i luma.
Na maea lea ona alo ane loa lea o le fanau e faatali le alii o Santa ma lana taga meaalofa. E taunuu mai Santa ua leva ona sauni atu le fanau mo se meaalofa o lenei foi Kerisimasi. Sa tufatufa loa meaalofa a Santa mo le fanau ona sosoo ai lea ma le taumafataga mo matua ma le auvalaaulia sa auai i le faafiafiaga i lea aso.