Matagofie le toe aso o fanau a le Aoga Amata Fetu Taiala

O taga eseese ma foliga fiafia sa molimauina i le aso mulimuli o aoaoga a le fanau i le Aoga Amata a le Fetu Taiala i le Aso Faraile na tea nei.
O se aso sa matua faatumulia aua e talitonu le faamoemoe, o le aso e faailoa ai le titi faitama o matua e ala i mea faatino ma gaioigafai o aso faapea.
E le gata i le fiafia sa faaalia i pese, siva ma taga o lea foi aso, ae o le itu foi i taumafa ua le mafai ona faamatalaina le tele.
O le tulaga sa maitauina ona sa tuufaatasi faamanuiaga o fanau laiti mai aoga e tolu o loo iai i totonu o le lotoa. E lua aoga Samoa ma le aoga a Rarotonga.
O le Puna o le Atamai le isi aoga amata Samoa sa iai foi faatasi i le lio o fiafiaga i lea aso.
O le fiafia sa faapitoa lava mo alo ma fanau ua ausia le lima o tausaga, ma o le a le toe foi mai i le Aoga Amata mo le tausaga fou, ae o le a siitia mo le isi laasaga e pei ona masani ai le faasologa o le olaga aoaoina ma fuafuaga a le Matagaluega o Aoga.
O le isi vaega sa faailoa foi e tusa ma lipoti ma polokalame na molimauina, o le faameaalofaina lea o nisi o fanau na maitauina e faiaoga le tulaga siisii pea i luga o le agavaa ma le tomai, i galuega faatino i totonu o le potu aoga mo le tausaga atoa.
O nisi o le fanau pe a fuafua atu i tausaga sa tolaulauina ma faailoga na tuuina i ai, e fai lava si laiti o tausaga, peitai sa faamatala e faiaoga le televave tele o gaioiga ma le gagana sa latou faatino ai aoaoga.
O le molimau lea sa fofogaina, ma e lei iai se tasi o pule aoga mai aoga e tolu, na ese mai ai se lagona e pei ona faamatalaina i taimi o a latou saunoaga, ma le tuuina atu o faailoga sa lautogia ai le fanau.
O Aoga Amata a le Fetu Taiala, ma le Puna o le Atamai, o nisi o aoga ua fai si leva ona tautua mo fanau laiti. O ni aoga o loo lesitalaina faaletulafono i lalo o le faamalu o le Sosaiete a Aoga Amata a le malo. Saunoa foi le faletua ia Vaitavae o le pule ma le faauluuluga o le Aoga Amata a le Fetu Taiala, o loo tele pea le avanoa mo lenei tautua mo alo ma fanau a Samoa mo le tausaga fou e faaulufale atu ai, pe afai o iai ni matua o loo tau saili se aoga mo le fanau.
Sa toe faamanatu foi i le saunoaga a le tamaitai pule, le taua tele ma le aoga o le iai o aoga faapenei mo fanau a le atunuu, ae sili atu ona taua, le auai o fanau e faaaoga ai tautua ua saunia mo i latou, aua le lumanai.
O se avanoa foi na molimoli ai faamanuiaga o le Kerisimasi ma le Tausaga Fou mo tamaiti ma matua uma o le Aoga Amata a le Fetu Taiala mo le tausaga 2009, e auala atu i le Samoa Times ma lana tautua, mai le tamaitai pule ma faiaoga uma, aemaise o fanau o le a le toe foi mai i le tausaga fou 2010.