E toatele alo ma tama fanau a le atunuu na faamanuiaina i le latou faauuga e pei ona iai i le Manukau Institute of Technology i le vaiaso talu ai, e faafoi ai le viiga i le Atua ona o le poto ua Ia foai, ae o le faafetai mo matua ma aiga i le soifua lagolago ae maise ai o le faamalo i tamafanau i le finauina o le ola aoaoina i soo se mataupu, lea ua pale mai lou tautiga, o le afu sisina aemaise tauiviga ma le faapalapala, lea ua selesele i le suamalie i le tofo i mea lelei.
O le tamaitai o Carol Godinet, o le alo o Lui ma Nellie Godinet o le afioaga o Leauvaa, na faauu mai lona faailoga o le Diploma in Tourism Management, e lua tausaga sa tauivi ai, ae i sana faamatalaga i le tusitala, e ese le faigata ona o le tau faapolokalameina o lona taimi aoga, o lona taimi mo si ona tina ua matua le soifua i Aukilani aemaise o si ona alo o Samuel 4 tausaga i le aveina i le aoga.
Ae peitai sa tumau pea lona filiga ma le naunautaiga e tulimatai se faamoemoe o lana miti i le fesoasoani mai o le Atua, na ia taua foi, aua le fiu gofie “sky is the limit”, ma o lana faamalosiau foi lea i ona uso ma tuagane o loo aotauina i soo se matata mai soo se faleaoga. O loo faaauau pea lona taumafai mo lona faailoga o le Bachelor of Applied Communications i totonu lava o Manukau. E maua ai foi ma lenei avanoa e avatu ai faamanuiaga a le Samoa Times i alo uma o le atunuu: Faamalo tauivi, malo tau, malo tausala i lou faaea aiga, faaea ekalesia aemaise lou atunuu e te mitamita ai.
