O le sosaiete a Alii ma Tamaitai sa tautua i le galuega faaleoleo i le Matagaluega o Leoleo ma Falepuipui, ua latou ioeina le faatu o se atinae e faaaoga i ai lo latou tomai faaleoleo, o le faatuina lea o se aoga ave taavale poo se Driving School. O se uluai aoga ave taavale lea o le a faatuina i Samoa, i le tuanai o tausaga e tele e lei iai lava se atinae faapea. O le toatele lava o tagata ua silafia nei uu le foeuli o le taavale, sa a’o lava e isi foi tagata ua iai le silafia i le faiga o lea foi matata ua avea nei ma auala ua maua ai galuega a nisi tagata e toatele. Ua leva ona pasia e le sosaiete a alii ma tamaitai sa tautua i le galuega faaleoleo lenei fuafuaga, peitai sa faatuai ona faatino ona o le leai o se ofisa autu e tapuvae tasi i ai galuega a le sosaiete.
Ua faaalia mai e le Peresitene o le sosaiete le afioga Tusa Misi Tupuola, ua talia e le Komesina o le Matagaluega o Leoleo ma Falepuipui le susuga Papalii Lorenese Neru, le faaaogaina e le sosaiete o se vaega i lalo o le fale tuai o loo i le itu i uta o le ofisa fou na fausia e le Malo o Ausetalia. “O le faamoemoe o le fia faafou ma vali le vaega lea o le fale tuai sa iai ofisa o nisi o taitai leoleo sinia, ma a maea ona faatoa faaaoga lea”… na saunoa mai ai le alii peresitene i le tusitala o lenei nusipepa i se feiloaiga. O le taimi nei o loo manaomia e le sosaiete le lagolago a i latou sa galulue i le matagaluega mo le tapenaina o lo latou faamoemoe e ala i ni fesoasoani tau seleni, masini komepiuta, ma isi masini faaofisa mo le amatalia o galuega aua le faamoemoe mo se aoga ave taavale.
“O le naunautaiga lava lea o le sosaiete i le toatele o tamalii ma failauga, o faletua ma tausi faapea le malosi o le atunuu sa galulue ae ua auauna i nisi galuega po ua aumai foi i atunuu i fafo”, na saunoa ai Tusa. “E moomia lava le lagolagoina o le faamoemoe, ma ia logo mai foi le sosaiete pe a iai nisi e fia fesoasoani mai”. O le alii peresitene o loo galue o se tasi o faauluuluga o se tasi o matagaluega fou a le Malo ua faaigoaina nei o le Pulega o Femalagaiga i Luga o le Laueleele, le Samoa Land Transport Authority i Vaitele. O le taimi nei o loo faia se sailiga tupe a le sosaiete i Samoa mo le fia maua o se seleni e tau faatino ai nisi o nei galuega, peitai e le gafatia ai e sui o iai nei seia vagana se fesoasoani a i latou sa auauna ma tautua i le galuega faaleoleo nofo aitau malele ae o loo iai le agaga fia lagolago ma fesoasoani.
O le autu o le atinae o le ofoina lea o tomai faaleoleo e aoao ai tagata i tulafono o le alatele aemaise o tulafono mo le tausia o le saogalemu e le gata o luga o le auala ile taimi e tagofia ai le foeuli, ae faapea foi i le tapenaina o se tagata ua fia silafia ave le taavale i vaega uma e nofo uta i ai mo le faia o lea galuega taua. O sui lava o le sosaiete o le a faatautaia le aoga ave taavale ma saunia aoaoga mo tagata ua fia ave taavale. O loo iai le talitonuga o le peresitene le afioga Tusa Misi Tupuola, o se atinae taua lea e le gata o le a toe faaiila ai le galuega faaleoleo mo sui o loo talavou ma maua le malosi, ae o le a aoga foi sui ua matutua e faufautua ma lagolago i le faatinoga o le aoga. O le masina fou o loo faamoemoe e tatau ona amata ai galuega o le faafouina o le ofisa autu o le sosaiete ma faagasolo ai loa tapenaga uma mo le faamoemoe.
