Ua mafua lenei fesili ona o se talosaga a se alii Niue mai Waitakere na faaoo atu i luma o le komiti faapitoa a le palemene o loo iloiloina talosaga mo le fuafuaga a le Malo e faavae se Super City mo Aukilani.
O le talitonuga o lenei alii, e le gata e tatau ona iai ni nofoa faapitoa mo Maori, ae o se mea tatau foi ona iai se nofoa faapitoa mo tagata Pasefika o Aukilani.
Fai mai lenei alii o le lipoti a le Komisi Suesue mo le Pulega o Aukilani (Royal Commission on Auckland Governance Report) na faaalia ai afai e iai se fuafuaga mo le faatulagaina o le pulega o Aukilani aoao, e fautuaina le faigamalo ia iai ni nofoa faapitoa e tolu mo Maori, ae ia faavae ni komiti faufautua mo tagata Pasefika ma tagata Asia.
Peitai ane ua manatu lenei alii Niue, ua fiu foi e auai i komiti faufautua, e leai lava se malosiaga, e pule lava latou o loo iai le pulega o se faigamalo laititi. O lona lava talitonuga ua fiu foi tagata Pasefika e tauva i tofi mo le pulega o Waitakere ae leai lava se isi ua manumalo ona o le toatele o tagata palota o tagata Papalagi, ma e palota lava latou i sui e suafa Papalagi. O le mea lea ua talitonu ai ia afai e moni le faaupuga a le Malo e faatauaina tagata Pasefika, e tatau foi ona iai se nofoa e tasi e faapitoa mo tagata Pasefika, ma e palotaina foi e tagata Pasefika.
Ou te manatu afai ae talia lenei talosaga e le Malo, e manumalo lava se Samoa i lea nofoa ona o le toatele lava o tagata Pasefika o Samoa, ma e pine faamau i talafaasolopito o Niu Sila i le saili malo o tagata Samoa.
Peitai, ua teena lea taofi e le tele o talosaga ua tuuina mai e tagata Pasefika, aemaise lava talosaga ua fofogaina e nisi o tamalii Samoa. O le talitonuga o ia sui, e talafeagai le iai o ni nofoa faapitoa mo Maori, ae e le talitonu i le lagolagoina o le iai o ni sui faapitoa mo le Pasefika.
O le talitonuga a le toatele o loo mafai lava e sui o le Pasefika ona manumalo mai itumalo o Otara ma Magele. E ui foi lava e leai ni nofoa faapitoa a le Pasefika i le Palemene a Niu Sila, ae ua iai sui Samoa poo Pasefika ua avea ma faipule i itumalo faalauaitele e pei o Magele ma Maugakiekie i Aukilani, ma le itumalo o Mana i Ueligitone.
E taua tele le mataupu ua laga e lenei alii Niue ma ou te talitonu o se mataupu e tatau ona tatou iloilo pea i ai aua e faatupu manatu i ni vaega eseese. O le vaega muamua poo ai o vaega faaupufai o loo iai nei ua fai ma a latou masani le lagolagoina o mataupu e faatatau i tagata Pasefika? Ona fesili lea, o se mataupu lenei e lagolagoina e le Malo o loo iai nei pe leai?
O le isi itu taua o lenei lava mataupu, poo se mea tatau ona iai se nofoa faapitoa a le Pasefika i le pulega fou o loo fuafua mo Aukilani, a o lenei e leai se nofoa faapitoa o Maori, o latou e ana fanua ma eleele o Aotearoa? O le toatele o nisi o Papalagi o loo faitio pea i Maori, fai mai e mafua lava ona leai se isi e manumalo i faigapalota mo faigamalo laiti i Aukilani ona o latou lava ia. Ae fai mai foi isi e mafua ona leai ni sui i faigamalo laiti ona o le faailogalanu o tagata palota. E vaai atu loa le isi toeaina Palagi i se suafa e foliga o se tagata Maori, poo se tagata o se isi atunuu, ona le palota lea i ai.
Ou te manatu e taua tele le iai o tagata Pasefika i le pulega fou o loo fuafua mo Aukilani, ae aupito i sili ona taua le iai o ni sui i soo se vaega o pulega a faigamalo o Niu Sila, ma ia toatele ni o tatou sui.
Ou te manatu foi e taua tele le filifilia o tagata e alolofa moni, e faamaoni, ma e malamalama i le aganuu ma le gagana, e mafai ai ona finau atu mo se manuia o o tatou tagata.
Ae e silisili ona taua le iloiloina lelei o mataupu ua faataua e lea sui, ma lea sui, ona o nei mataupu ua faavae ai talitonuga, ma avea ma anavatau o ana fuafuaga mo le lumanai.
O ina tonu e iloa ai le sui e faamaoni lona alofa, ma le sui ua naunau i le tofi mo na o ia lava.
