E itiiti se vaega o le laau faasaina o le maruana na maua o umia e le alii faiaoga o Tanielu Viali mai Vaimoso, ae e matuia tele lea soligatulafono i le silasila a le faamasinoga. Ua sili foi ona ogaoga lana solitulafono ona o ia o loo feagai ma le aoaoina o fanau, ma e le tatau ai ona avea o ia ma faataitaiga leaga i le vaai a tamaiti. Na maua e leoleo se afifi laititi o umia e lea alii ma mafua ai loa ni suesuega ma molia ai o ia i le moliaga e tasi o le umia o laau faasaina. Na ioe le alii faiaoga i le moliaga ina ua valaau le mataupu i le aso 22 o Iuni 2009, lea na talosaga ai lana loia o George Latu, e tuu atu le faia o se faaiuga a le faamasinoga i le faaiuga o le tausaga i le masina o Tesema, ae e lei talia e le faamasino sili le afioga Patu Tiavaasu‘e Falefatu Sapolu.
Na faamatala e le alii loia e faapea, e faigata mo le ua molia ona tiute faafaiaoga, o le vaai a tamaiti i lona tulaga o se faiaoga pe afai e vave faia se iuga ae taunuu i se faasalaga faafalepuipui. O lea finauga a le alii loia na ia taua ai foi se poloaiga a le faamasinoga e faasa ona faasalalau le suafa o le alii faiaoga, ona o manumanuga lava i le afaina o lana galuega faafaiaoga. Peitai na talia le faasa o le faasalalau o le igoa ae togi i fafo e le faamasino sili le tuu atu o se faaiuga i le mataupu i le masina faaiu o le tausaga. O le Aso Lulu 15 o Iulai 2009 na fofogaina ai loa le faaiuga i luma o le alii faamasino o Vui Clarence Nelson, lea na aveesea ai le tapu, ae faataga ona faailoa le suafa o Tanielu Viali.
Soloia le faamaonia o le moliaga
O le faaiuga a Vui Clarence ua talia ai le talosaga a le loia a le alii faiaoga mo le faaleaogaina o le faamaoniga o le solitulafono lea e taua o le discharge without conviction. Na faaalia e le alii faamasino ua na talia foi ma le folasaga a le alii loia mo le ua molia i le ogaoga o ni aafiaga o le alii faiaoga talu lana solitulafono, e pei o le faamalolo ma lana galuega o loo avea ai ma faiaoga o le Kolisi o Sagato Iosefo, pe afai nei e faamaonia le solitulafono ae alu i le falepuipui. Saunoa Vui e ui ina faapea o le falepuipui lava le faasalaga o le umia o laau faasaina, peitai e iai lava mau autu e mafua ai ona eseese ni faaiuga a le faamasinoga e faia ia i latou e molia atu i lea ituaiga o soligatulafono.
O le tasi o vaega na taua e le alii faamasino o le folasaga a le loia a le ua molia, na ia taua ai o loo toagaogao faiaoga o le kolisi, ma afai ae faasalaina Tanielu i le toese, ua leai se faiaoga e tauaveina le mataupu faasaienisi aua ua na o ia lava le faiaoga o lea mataupu. Ua talia foi le mau a le itu tetee e faapea, e le toe maua lava se isi galuega mo Tanielu, pe a motusia lana auaunaga faafaiaoga aua e na o le pau lava lea o lona tomai e aunoa ma se isi lava poto o ia te ia e toe maua ai se isi galuega.
Ua fautuaina le alii faiaoga e tele isi auala e mafai ona alu e faamanatu ai ni aso taua ma fiafia ai e pei o le tifaga, ae le o pati ma inuga pia, e aafia ai i ni soligatulafono faapea. Ua faatonuina na te totogi se sala tupe e $350 tala ua aofia ai le totogi o le faamasinoga, le totogi o suesuega a leoleo, ma le totogi o isi auaunaga na faaaoga i le suesueina o lona moliaga. A ta le 12 o le aoauli o le Aso Tofi, 16 o Iulai e lei totogia, e tolu masina e nofosala ai i le falepuipui. E tusia lenei lipoti ua maea ona totogi lea sala tupe e le alii faiaoga, ma ua toe foi nei i lana galuega ua silia i le 20 tausaga o auauna ai.