Sa tofu lava le Mauga tapuai ma le Matua e faalaeiau ai i Tina auā le faamanatuina o lo latou Aso. O le Sini lava ia faamanatu pea lo latou matagofie ma le faigata i le atiaeina o aiga aemaise lava fanau. O faufautua lelei mo tamā i faaiuga e lelei ai mea uma mai le fale seia oo lava i falefaigaluega ma Ekalesia o tautua ai.
I Ausetalia nei aemaise lava i Sini o totonu lava o Malumalu ma Ekalesia na matuā vaaia ai le laugaina o Mau mai le Tusi Paia e molimoli ai le faafetai ma faamanuiaga a aiga taitasi i o latou tina. E le gata i lea ae na vaaia ai foi Faasolo ma Ula lole felanulanuai o faaula ai i latou.
O se aso foi e tasi e aualofa ai le fanau ma tamā i le Pae ma le Auli o le aiga faapea le manatuaina ai o nai Tina ua fai i lagi la latou folauga. I Sini lava ia ua vaaia foi le siitia o fuainumera o tina ua saili galuega ma tamā e faamāmā avega i le tamā auā taimi e moomia tele ai le seleni. O le iai o sifi taeao, aoauli ma le po ua mafai ai ona maua le avanoa o nisi tina e fetuunai ai sifi galulue ma taitoalua.
O le itu lava o le sauniuni i faalavelave ma mea e fai a aiga ma afioaga mai Samoa ma Sini nei ua laasia ai nei fuafuaga. O le vaaia foi o le maualuluga o seleni ua taui ai tama Samoa taaalo e pei o Sani Pili Viliamu (SBW) Tipi Ioane (Digby Ioane) ma Timo Kaili (Tim Cahill) ua unaia ai isi mātua ia tapuaia ma lagolago malosi taumafaiga a fanau mo le lumanai manuia. Ua lē gata o tamā e avea tamaiti i le aoga lakapi ae faapea foi tina pe a lē faigaluega i lea taimi.
I totonu o Ekalesia ua maua foi tofi tiakono ma faiaoga Aso Sa ma faasolo mai lava o latou tiute faafaiaoga i le faatonutonuina o fanau pe laiti pe matutua. O fanau foi ua sili atu ma le sefuluvalu tausaga (teens) o tina Samoa lava e numera tasi i le faatonutonu pea e tusa pe faigata uiga o fanau tama ma teine lea e faataitai i tu ma aga a tamaiti papalagi e oo loa i tausaga nei saoloto loa.
E ui i le fita ma taatele nei faafitauli i fanau Samoa ae o le tele lava o feeseeseiga e toe foia lava e tina auā o le tele o nai tamā e mātele lava i le faaaogā o le sasa ma le fasi pe a ita tele. O nisi foi o tina ua iloga ia latou pisinisi i Sini nei mai faleoloa, suisui, suetusi, faleaiga, ofisa lafo tupe ma vai faamalositino.
O se tasi o tina aupito lauiloa i le taimi nei i Ausetalia o le tina ia Letti Lyric Macfarland lea ua sao atu i le tauvaga pese a Ausetalia i luga o le ala ata iva (Channel 9). O lona siufofoga mālie ma uiga tausaafia ua palota tele i ai tagata mai lea vaiaso ma ono oo atu i le vaiaso fou.
Ua leva ona pese o ia i le faaili e faaigoaina o le Brown Sugar faatoa Sao atu ai i le ‘Voice’. O taimi uma e pese ai Letti Lyric Macfarland e matilatila mai ai lava le igoa o ‘Samoa’ i lana pe‘a i lona tau‘au ua silafia uma ai e le lalolagi o ia o le Samoa. O le mafuaaga lea o le palota ai o nisi tagata faatoa iloa o se Samoa o ia ma tagata lautele foi.
O se faalauiloa maoae lenei mo Samoa ma e talosia ia maua se avanoa e aulia ai le tauvaga i le vaiaso fou. Ia manuia lo outou Aso Faapitoa tina.
