Faauuina Lisa Toalepaialii Kaliappan, faailoga Pisinisi

O le miti a mātua ia manuia aoaoga a le fanau auā so latou lumanai manuia faapea aiga Ekalesia ma Afioaga. O le lumanai foi o se atunuu. O le vaiaso talu ai na taunuu ai lea miti mo mātua ia Maria Toalepaialii (Satapuala) ma lona alii ia Togitele Tuala Pilia‘e (Leulumoega) o Erskine Park i Sini nei. O le la alo tamaitai ia Lisa Kaliappan Toalepaialii na faamanuiaina i se faailoga o le (BA) Bachelor of Arts in Business Studies, major in Accounts & Human Resources.
O se aso fiafia mo mātua ma aiga na malaga mai Melepone, Kuiniselani, Aukilani ma Ueligitone e molimauina lona faauuga. O le tamā o le tina o Lisa le Afioga i le Sa‘oalii ia Toalepaialii Toeolesulusulu Siueva Pose Salesa lea na tuumalo i le 2008, sa avea ma faamalosiau i le tamaitai talavou a o soifua mai.
O loimata maligi o le fiafia ma le faafetai i le Matai o i le lagi le vaaiga na iai lea aso auā o se laasaga mataina.
I Sini Ausetalia nei, e toaitiiti fuainumera a tama ma teine Samoa e ausia faailoga maualuluga faapenei ae toatele alo ma fanau a Samoa e pagatia i le toasa o le tulafono.
O le faaopoopo la o le suafa o Lisa Kaliappan Toalepaialii i le aufaauu mai Iunivesite o Sini e faafiafiaina tele ai e lē gata o mātua, aiga ma uo faapea foi tamalii o Samoa o loo galulue i tautua eseese i Ausetalia nei, e pei o Loia ma Leoleo faapea Faufautua (counselors) i le vaai atu ua manuia se tauiviga faigata a so tatou alo Samoa ma aoaoga i lenei atunuu o avanoa.
Na faailoa e le tina ia Maria Toalepaialii Pilia‘e i le Samoa Times le agaga faafetai i le Atua i lana faamanuiaga faapea taumafaiga a Lisa. Na ia saunoa foi i le alofa mafola o le Silisili Ese i o la alo ma le Tofa Togitele Pilia‘e, lea foi ua folifoli mai le tamaitai lona lua ia Rosemary Kaliappan Toalepaialii e faauu i le faaiuga o le tausaga nei i se faailoga BA o le Architecture (tusiata).
O tausoga a le tamā o lo latou tina ua loa foi ona tautua i le Malo e ala i le Faiaoga, o le Afioga Fuatino May Saaga lea na tuumalo i le tausaga nei. O i latou nei na avea ma taiala mo Lisa Marie ma Rosemary faapea o la tuagane laiti ia Si‘u Jr ma Akeripa Jr. E moni ai le upu masani a le atunuu ‘e au le inailau a Tamaitai.’