Faamanatu 50 tausaga o le soifua o Rev Nonumalo Fereti Willie Toleafoa

O le ausia o le 50 tausaga o le soifua o se faamanuiaga tele lea mai le Atua, aemaise pe a mafaufau i le tele o toatuga o lenei soifuaga e ono lamatia ai lo tatou ola ma le soifua i aso taitasi. E toatele foi na moomoo ma tausini ia aulia nei tausaga e tele, ae pagā lea ua faamutaina moemitiga uma e le pule faitoatasi a le maliu ma le oti.
Atonu o le ala lea, na lē mafai ai ona natia le naunau o le faletua ia Rebekah Toleafoa faapea le nofoaalo e faailoa lo latou faafetai fai a‘e i le Atua, ona o nei tausaga e 50 ua ia faamanuia mai ai i le soifua o si o latou tamā, le susuga i le Faafeagaiga a le ekalesia Assembly of God Church of Samoa Papatoetoe, Rev Nonumalo Fereti Willie Toleafoa, e ala i se fiafia faapitoa na momoli ai a latou faamanuiaga ma moomooga alofa i lo latou tamā.
O le Aso Toonai na se‘i mavae atu nei, aso 11 Me 2013 na faamanatu ai i se sauniga faapitoa ma faafiafiaga i le Pulepule Hall i Mangere le atoaga o le upeli auro o le tamā, le susuga i le faafeagaiga.
O Rev Nonumalo o ia foi o loo tauaveina le tofi o le Teutupe a le Magaluega a Niu Sila atoa mo le Assembly of God Church of Samoa New Zealand.
O le afioga i le Aposetolo, o le Taitai foi o Niu Sila, Rev Talosaga Kome, sa taitaia le sauniga o le aso fanau, ma molimoli mai foi se upu faalaeiau faaleagaga e tomatauina atili ai le soifua auauna o le  susuga i le faafeagaiga.
O le Faafeagaiga mai le ekalesia Faith City AOG i Sini Ausetalia, Pastor Opeta Tautalafua, na avea ma Fofoga o le polokalame atoa o le Aso Fanau. E tusa ma le 300 le auvalaaulia na auai i lea aso, e aofia ai le to‘a 30 o Faafeagaiga, Failauga o le Talalelei, Tiakono ma o latou faletua, o tauaiga faapea ma uo.
Matagofie teuga uma sa tapena i ai le faletua ma le nofoaalo, ma na mae‘a le aso ma lagona o le fiafia ma le faafetai, faamalieina le aofia atoa i itu uma sa gaseā i ai le aiga. Ae na taualuga lenei aso tāua i le meaalofa a le tina ma le fanau, o le pikiapu paepae double-cap, o se taavale fou lava o le tausaga lenei, 2013, e tusa lona tau ma le $45,000. O se meaalofa taugata faapenei, o le faaleoga lea o pelega a se aiga, ma lagona o le matuā faamalieina i le tausiga a se tamā lelei.
O le susuga i le faafeagaiga ma le faletua e toafitu o la alo: Paulo & Tessa, Fanueli & Feresina, Taume, Vasa, Israel, Kome, ma Blessing TOLEAFOA. O fanau a fanau (grandkids): Immanuel, Katalina, Judith-Angel, ma Master Mesako. Manuia tele le aso soifua!