“Ou te faafetai i Fomai i Niu Sila ma Samoa i le fesoasoani e saili se togafiti mo si a‘u tama teine”..Mauaso Farani
Ua toe faatasia nei le tamaitai laititi fitu tausaga le matua o Perise Farani o Alafua, ma lona aiga faapea lana aoga tulaga lua i Vailoa Faleata, ina ua manuia togafitiga sa faia i le falemai o tamaiti i Niu Sila o le Starship i ni ona auga o le gasegase faigata o le kanesa.
O le vaitaimi lenei o le tausaga ua mavae na motusia ai aoaoga a le tamaitai o Perise ae saili togafiti i fafo e ala i se fesoasoani a le Malo o Samoa ma Niu Sila. O le Aso Faraile na tea nei 28 o Setema 2012 na toe feiloai ai Perise ma tamaiti o lana aoga aemaise o lana vasega ina ua manuia lana siiga ma‘i.
Na faamatala si ona tina i le tamaitai tusitala o Asenati Taugasolo e faapea na amata ona molimauina aafiaga o lona alo tamaitai i le kanesa i le faaivaiva ua lē maua sona fiafia ma ua alu foi lona tino, poo ua paee, ae o se fiafiaga tele i lona tina o Mauaso lea ua ia faamatala o se vavega ua mafai ai ona manuia le mai o si ana tama sa faapea e tupu ai se faaletonu.
Ua ia faafetaia ai fomai i Niu Sila ma Samoa ona o le fesoasoani ua mafai ona faasaoina ai le ola o si ana tama teine.
Na malaga mai lava se au pueata televise mai Niu Sila le polokalame o Tagata Pasifika a le TVTasi a lea atunuu, faapea le faletelevise o le skyTV e pue se polokalame o le tala fiafia o le siigama‘i a Perise ma o le vaiaso fou e pei ona faaailoa mai, o le a faaali ai lea polokalame i televise i NZ, ma o le a maimoaina foi e lo tatou atunuu.
O le manuia o togafitiga o le alo laitfiti o le tatou atunuu, ua faailoa ai e le pulega o le falemai o tamaiti le starship i NZ e toalua ni tausi soifua i le matagaluega o le soifua maloloina ua maua se avanoa e tasi le masina e malaga ai i se aoaoga faafomai a le Starship hospital mo le togafitia o fanau. O tausi soifua ua filifilia mo lea avanoa o Telesia Lafaele ma Leata Satiu.
O le a aoaoina i laua i nisi tomai faatausi soifua mo le mataituina o auga o fanau e aafia i le tuma o le kanesa faapea isi auaunaga e tatau ona ofoina mo i latou.
O se avanoa faaauro ua maua e ia tausi soifua e toalua ua tele tausaga o auauna i le matagaluega, ae mo le tamaitai o Perise ua toe alu fiafia i lana aoga ma ua toe faatasia ai ma ana uo sa latou valavala ona o lana siigama‘i.
