O suesuega i faiga faaalatua i le matagaluega o leoleo e pei ona aafia ai ma le pulega o le falepuipui i Tafaigata, ua faaalia nei e le Loia sili le afioga Aumua Ming Leung Wai, o loo faaauau pea ia suesuega ma e sese lipoti e faapea ua avatu ia te ia le taunuuga o suesuega.
O le vaiaso na tea nei na faailoa ai e le sui sooupu o le matagaluega o leoleo ma falepuipui le afioga i le Komesina lagolago o Leaupepe Lealaitagomoa Fatu Pula, e faapea o le vaiaso atu i tua na mae‘a ai suesuega ma ua tuuina atu le faaila o le taunuuga o ia sailiiliga faalotoifale i le Loia sili mo sana iloiloga ma se fautuaga e tuuina atu i le komesina o le matagaluega.
Peitai ua faaalia e le Loia sili i sona finagalo sa lipotia e le leitio faavaomalo a Niu Sila, e faapea o le taimi nei o loo silasila lona ofisa e filifilia ni leoleo e latou te faia le suesuega faatasi ai ma se sui o le ofisa o le Komesina o sulufaiga. O loo faia pea la ia sailiiliga e lei mae‘a e pei ona faaalia e Aumua Ming Leung Wai.
E lē o mafai e le Loia sili ona ia faailoa poo afea e maua ai se taunuuga o lea suesuega ae mo le sui sooupu o le matagaluega o leoleo ma falepuipui na ia faailoa mai i le amataga o le vaiaso le mae‘a o ia suesuega, ma o loo faatali se fautuaga i le komesina o leoleo mai le Loia sili. Ua faaalia e Leaupepe Fatu Pula, e tumau pea lona finagalo ua mae‘a le suesuega, ma ua ave le faila i le Loia sili.
Pau le itu na ia faaalia atonu o se isi gaioiga a le Loia sili o loo toe faia i le suesuega ona o le isi lea itu o lana pitolaau o le toe lauliliu pe review le suesuega atoa.
Ae o loo tutumau foi le Loia sili i lana mau e pei ona ia faailoa i se tasi o lipoti i le faaiuga o le vaiaso na tea nei, i se tasi o itutino o faasalaluga i Samoa, e na te lē iloa lava poo ai na faia le faamatalaga ua avatu le taunuuga o le suesuega ia te ia.
I se isi o tala mai lea matagaluega, o le Aso Faraile na tea nei na faauu ai leoleo e to‘a 20 ua mae‘a a latou aoaoga i galuega faaleoleonanā poo le police detectives. O se leoleo sinia mai le vaega o leoleo a le Malo Ausetalia na faatautaia lea aoaoga mo le masina atoa.
O le a faaaogā tomai ua maua e ia malu o le Malo i le faatinoga o suesuega i le tele o solitulafono o loo lipotia pea i aso taitasi i le vaega suesue o le matagaluega.
