Tusi Faitau: Mataio 15:22-28 (f28 “…Funa e, ua tele lou faatuatua; e pei o lou manao, ia faapea lava na faia ia te oe…”)
A o e faitio i le tuai o le tou fale, tuai le taavale o feoai ai, ma meaai o tausasami ai, ae iai isi o loo faafetai i falaoa ma le vai ua maua. E tatalo foi nisi ia maua ni fale, ma sina taavale e fesoasoani i le aiga.
A o faa‘ono‘ono ma tetele le faalogotatā o lau fanau, fetuu ma alualu e leai ni tupe e avatu, ae o loo iai mātua o loo tatalo faatoga e fia maua ni fanau. Poo nisi o loo faanoanoa, ua maliliu fanau, i ma‘i poo ni faalavelave.
Afai e fia maua le faautautaga oo, e tatau ona suia loto, lagona ma mea e faatāua i le vaai. A aunoa ma lea, e na o le ola faitio ma le losilosivale e oo mai.
A oo mai faafitauli, e iai faatasi ma avanoa e filifili ai pe faafetaia le Atua, pe faitio i le Atua. Pe lafoai faafitauli i le Atua, pe taumafai e foia i lou lava malosi.
O le tele o faafitauli tau le galuega ou te taumafai e foia i lo‘u iloa, e faateteleina ai lo‘u tiga, ma tiga ai ma lo‘u toalua. Ae soo se faafitauli ma te tatalo ma tuu i le Atua, ma te maua le filemu ma le fiafia, e liua foi lea faafitauli i se faamanuiaga.
Ua ou filifili ia ou ola fiafia, tusa pe faigata luitau o lo‘u olaga. Ua ou vaai i tagata e feoai pei ni sumu ma gutu e faauu, lē fiafia ma foliga matamata ita. E ola lē fiafia.
E vaai atu le ausoo i le po ua savali mai le tagata i luga o le vai. Ua fefefe ma faapea, o le āitu. Aisea ua manatu ai o le āitu? Aua ua fefefe, sola le faatuatua ma galo lo latou Alii e faivavega.
E iai taimi e faapea ai tatou, pau lava mea tatou te iloa na o āitu, āitu lava. Pei o le vaai a le ausoo, tainane lava o Iesu, ae ua āitua uma mea i lau vaai ma lau faalogo. Poo a ni mea lelei, ua leaga i lau vaai, o atinae manuia, ua faaletonu uma i lou manatu. Afai e te alu i le lotu ae na o āitu e te vaaia, o lona uiga e iai le mea o faaletonu ia te oe. Atonu e lē mamā lou loto, poo iai ni agasala lililo e te masani ai, ae ua e masalomia ai fua isi tagata.
E ā lau vaai i lau fanau? Ae ā lau Ekalesia? E tatau ona e iloa atu tagata manuia, tagata faaaogāina, tagata e agavaa ma meaalofa a le Atua e faalautele ai lona malo. E tatau ona e iloa atu ni loia, faiaoga, ma nisi e avea ma fomai i le lumanai. E tatau ona e iloa atu le aao faamanuia o le Atua i o latou olaga, ma tupu ai le agaga faafetai e mafai e le Atua ona suia ma faaolaina i latou, e ui o loo fesoua‘ina e faafitauli, ae e te iloa lo latou lumanai manuia i le Atua.
Sulu mai i lo matou aiga le afafine o le isi faifeau. O le teine ua puapuagatia, ma pologa i le faaaogāina o fualaau faasāina. E atoa le vaiaso o matou nonofo ma tatalo ma fesoasoani i ai, seia oo ina malamalama ma manao e nofo mo sina taimi, se‘i tau togafiti ona mafatiaga.
Ua ou malie i le tonu lea, ona matou o lea i ona mātua e talosaga i ai, ua ou iloa e mafai e le Atua ona fesoasoani mai. Ua taunuu i lona aiga ma fai le folasaga. Na matuā ou lili‘a ma gatete ina ua tali mai le faifeau, ‘a ō uma la i le lagi, a o ai e ō i Seoli! Tuu ai pea, e tatau foi na o nisi i Seoli.’ Sa ou meia, te‘i ma ou faapea, na o āitu lava e iloa e si uso lea.
I le tatou matua, o loo faamatala ai le sulufai a le fafine Kanana ia Iesu mo se fesoasoani, ae tali Iesu, ‘E le tatau ona ave le mea e ai a le fanau, ma lafo i ulī.’ O saunoaga e matuitui ma ogaoga, ae lei faate‘ia ai pe fememeai le faautautaga a le tina lea.
Sa ia silafia lelei, o tua atu o nei luitau ma tofotofoga, o loo taoto ai le ola ma le faamalologa mo lana tama teine. Sa tali ane le tina ia Iesu, ‘e moni a oe, aua foi ua aai e ulī o momoi mea ua pauu i le laulau a o latou tāula.’
Sa lē avea le tali a Iesu e taofia ai lona taumafai, sa mautinoa, o le alofa i lana tama, e lavatia ai soo se faigata. Sa finau ma le talitonu, ma faamaloloina lana tama ma le tali a Iesu, ‘Funa e, ua tele lou faatuatua.’ Ana se tina ma‘ale‘ale, fia sisi, ma faaliigofie, ua lē tau lau o lona faamoemoe. O le tina faautauta.
E tele ina tatou faauiga sese mea e vaai ma faalogo i ai. E masalosalovale pe itaitagofie, ma avea mea faatauvaa e fai ma avega mamafa. O nisi feeseeseaiga faatauvaa, e faatupu vevesi, ona ua leai se faautautaga.
Ia faateletelegese lagona, ae manatunatu loloto i le uiga o mea o tutupu, ma silafia tagata ma o latou uiga, e faigofie ai na tali ma le faautauta, ma mafaufau i le Atua e fesoasoani mai. Manatua, o le faamasinoga tonu o loo i le Atua, e tatau ai le faautautaga oo, ne‘i faalumaina le osovale ma le fia mata muamua. Soifua.
