Vaega:3
Ma o le suia o se ulufatuga o se suafa, o se lavasiga ogaoga lea i totonu o se nu’u i lenei vaitau, ona e mafai e lenei suiga, ona sui atoa ai le fa’avae ma le saofa’iga a le nu’u, suia atoa ai le pule ma le fa’afoeina ai le nu’u, suia atoa ai fa’asinomaga, pule ma aia tatau, lagisoifua, laei ma lauvae o le suafa.
2. Ituaiga o Lavasiga
O ni isi nei o tulaga ua fa’atuputeleina ona ua taumafai ni isi e suia ma milomilo le ulufatuina o lona suafa matai. Ma o ni isi nei o lavasiga ou te fia talanoa iai e aofia ai:
2. 1 Suia o le Ulufatuga o se suafa.
2.2 Suia le fa’asinomaga po o le tulaga o se suafa matai i le va ma isi suafa
2.3 Suia le sipelaina o le suafa.
2.4 Tapu Fa’avae o le nu’u
2.5 Feteena’i tusi fa’alupega ma le fa’atinoga.
2.6 Itupaepae o suafa.
O ni isi nei o mafua’aga e pei ona ta’ua i luga, ua suia ai, ma afaina ai le tulaga o se suafa matai i totonu o nu’u ma ua avea lea ma lavasiga ma fa’alavelave ma fa’atupu vevesi i totonu o nu’u.
O nisi lava o tagata, ua taumafai lava e fa’amaonia nei suiga i le Fa’amasinoga o Fanua ma Suafa, ina ia fa’amautu ma fa’amaonia fa’atulafono ia suiga, ina ia mafai ona fa’atu se pule fou ma sona tulaga taualoa i totonu o lona nu’u.
2.1 Suia o le Ulufatuga o se Suafa
Faataitaiga: O LE SUAFA “Agaileali’i”
O le a ou faaaogaina le suafa lenei o “Agailealii” e avea ma fa’ata’ita’iga ina ia manino ai le lavasiga lenei.
O le suafa Agailealii, e foliga mai na ulufatu le suafa, ona o se fa’afeagaiga a se matai pule po’o se matai sa’o ma se isi tagata.
O loo matua faaalia manino i le sipelaina o le suafa Agailealii, le uiga o lea suafa. O lona uiga, “o mea uma e te maua, poo lo ta va nonofo ai, ia e aga mai i lou ali’i, pe aga i le alii.”
Ma o le ulufatuga la o lenei suafa po’o lona mafua’aga, o le aga-i le-ali’i. I se isi faaupuga, e tatau ona ia aloa’ia le suafa Sa’o po o le pule a le na toina atu ai le suafa.
Peita’i ua o’o mai i nei aso, ua tupu le atamai ma le tamaoaiga ma le saoasaoa o le aia tatau o suli ma feoi o le suafa Agailealii, po’o le tulaga ese o le tauaveina o lenei suafa e se o nofoia le suafa. Ma ua taumafai ai loa e suia le ulufatuga o le suafa, e ala i le suia o le sipelaina o le suafa Agailealii, i le suafa Agalealii.”
Suia le sipelaina o le suafa.
O le suia o le sipelaina o le suafa agaileali’i i aso nei i le suafa agaleali’i, o se aupega malosi lea ua fa’aaogaina e le suafa lenei e fa’amautu ai le suiga ma le milomiloga lea ua fai i lona suafa, ina ia maua’a ma talitonuina lana pule ma lona fa’asinomaga lea ua maua mai i le suiga o le sipelaina o le suafa.
O le suafa Agaileali’i, o lona sipelaina sa’o lenei na ulufatu ai, ae peita’i o le ave’ese o le mataitusi “i,” ina ua mavae le upu aga, ona sipela ai loa lea o le suafa e fa’apea, “Agaleali’i.” poo le fa’aopo’opoina o le mata’itusi “a” ona sipela ai lea e fa’apea, Agaaleali’i.
A fa’auiga la le upu Agaleali’i po’o Agaalealii, o lona uiga, “o amio, uiga ma aga a le alii.” Ma o lea ua foliga mai, ua suia atoa ai le uiga na ulufatu ai le suafa Agaileali’i ona ua suia le sipelaina o le suafa.
2.2. Suia le faasinomaga o le suafa.
O le ave’esea la o le mata’itusi “i,” poo le fa’aopoopo fo’i i ai le mataitusi “a” ua suia atoa ai le uiga o le suafa. Ma ua suia atoa ai foi ma le ulufatuga o le suafa, sui ai ma lona fa’asinomaga, sui le pule, sui lagisoifua, sui laei ma lauvae suafa, suia sasa ma mamalu o le suafa, ma ua oo lava ina taumafai e sui fa’alupega o le nuu, e ala i le sipelaina fou lea ua i ai nei le suafa. Ma o lea fo’i ua foliga mai, o ia lava na fa’apogai pe na ulufatu i le suafa, e ala i le suia o le sipelaina o le suafa.
Ma o lea fo’i ua foliga mai o le suafa Agaleali’i, o se suafa pule po’o se suafa sa’o, ae le o se suafa pitovao, pe o se igagato e pei ona afua ma ulufatu ai le suafa
E talu ai la sa le’i ano tele le suafa ma ona suli i suiga fou nei ua fai e Agalealii, ona sa nonofo lava i le feavata’i, sa le mafai ai ona lagalaga i nei suiga. Sa leai se manatu e tele i se afaina o le nu’u mai lenei suiga.
Ae peita’i o le nofo suafa i le Agalealii ma ona suli, e le o nonofo filemu pe moemoe noa, o lo’o ave atoa le malosi e fa’alauiloa ma finauina le suiga fou lenei, aua o lea ua maua ai le tulaga taualoa i totonu o le nu’u.
Ma o nei suiga e le’i tupu i se taimi vave. Na tuputupu lemu i ni tausaga se tele ma ua fa’apea ai ona talanoa atu ma fa’amatala pea e le aiga o Agalealii i totonu o le nuu ma le itumalo, ma i’u lava ina amana’ia ai i totonu o le nu’u ma le itumalo, ma ua avea ma ala ua talitonuina ai e lea auga tupulaga ma lea auga tupulaga lenei suiga fou. Ae peita’i e le o mafai ona mapu le fa’alogo pea i totonu o le nu’u, i le fesiligia o le moni o lea mea. Ma o lenei suiga ua fai ma lavasiga tumau i totonu o le nu’u.
2.4 Tapu fa’avae o le nu’u
O le tapu o le lagalagaina o faavae o se nuu, o le a’upega malosi lea poo se pelu e taufai ma’ai ona itu e lua (“two edged sword”), o lo’o fa’aaogaina e tagata nei, po’o suafa nei i totonu o le nu’u e puipui ai suiga fou lenei ua faia i lona suafa. Ua tu malosi e fa’asasa ma tapu le talanoaina po’o le fa’amalamalamaina o ulufatuga o suafa i totonu o le nu’u, e ala i le faapea mai, “Aua ne’i toe i ai se isi e tautala i faavae o le nuu, o le tagata e solia lea tapu, e soloia i le aufuefue.”
Ma o lenei lavasiga, o se mataupu ua tatau ona silasila totoa i ai ali’ita’i ma tumutumu o nu’u, ona o le tele o le afaina o le nu’u, pe afai e le malamalama tagata i fa’asinomaga o suafa o le nu’u, aua o i’ina o lo’o taoto i ai le fa’afoeina ma le fealofaniga o le nu’u.
Aua o le tapu pea o le le fa’amalamalamaina o ulufatuga ma fa’asinomaga o suafa, o le a fa’apea ona fa’ateleina finauga ma vesiga i totonu o nu’u, ona ua taumafai suafa nei e taofiofi le fa’amalamalamaina o ulufatuga o suafa, ina ia aua ne’i manino o latou fa’asinomaga e ala i le fa’asa’o o le sipelaina o lona suafa ma le ulufatuga o lona suafa.
Aua e i ai suafa na ulufatu mai, o ni suafa fai feau, ae peita’i o nei aso ua avea ma suafa e faia tonu o nu’u, po’o ua o’o lava ina ia foua le pule i totonu o le nu’u. Ma ua masani ona tatou faalogo i saunoaga a tagata nei o faapea: “Aua le fai mea fou, o le mea lava ua leva ona tatou ola mai ai, ma ua tapu ona toe lagalaga e se isi fa’avae o le nu’u.”
E i ai le talitonuga, afai ae fa’auauina pea le nofo le malamalama o le nu’u i lona fa’avae po’o ulufatuga o suafa, o le a avea lenei nu’u e pei o se va’a e lealea i le vasa e leai se tapasa, ma o le a fa’apea ona fa’aauauina ona ta’ita’i fa’ai’a matau lenei nu’u, e suafa fa’apenei.
E tatau ona tatou malamalama o ulufatuga o suafa, e afua ai lona faasinomaga, e afua ai le pule ma o le faavae lena o le nu’u, e fua i lou tupuaga ma lou faasinomaga.
ULUFATUGA O FEAGAIGA OSI.
E tele feagaiga osi a le atunuu, ae o le a fa’apito augafa se fa’amatalaga i le feagaiga osi a le tagata ma le Atua, e ala i se osiga feagaiga a le faifeau ma se afio’aga.
O le ulufatuina o lenei osiga feagaiga, na ulufatu ma fua i paia ma mamalu o le Atua. Ma o lenei osigafeagaiga o se maliliega po’o ni tautoga a itu e lua, i faavae o le va nonofo ai, ina ia aua nei fesopoa’i, ona o se feagaiga e paia mamalu ma mamala.
Ma o lenei osiga feagaiga, o se feagaiga o le va nonofo o tagata o le lalolagi, ma le tagata o le Atua po’o le sui va’aia o le Atua i le lalolagi e fa’ataunuuina lona finagalo, e ala i ana auauna, e o mai e militino fa’atasi ma le lalolagi, ae peita’i, e le o o le lalolagi i latou.
I le feagai ai ma le Aufaigaluega a le Atua i aso ua mavae, o se faafeagaiga e pa’ia ma mamalu, ona sa tau sega se aga, e tau to manatu se upu, e fou se tu, e le pao se laa, susu le Aufaigaluega a le Atua. Ae o le mea sili ona taua i lenei faafeagaiga, sa faalogina e tino le Agaga o le Atua i soo se mea e aleaga ai lana Aufaigaluega poo ona sui va’aia i le lalolagi.
I aso ua mavae sa memelo lagona, sa pulato’a le va’ai, sa pupuna le mimita pe a saunoa sa ta faifeau i ni fa’atasiga. Sa ola, oti, mo ia. Sa lilifa manatu, sa faaleo mea sili, sa ta fia i ai i le fale o Ieova i aso uma. A saunoa mai la ta faifeau ma fautua mai i le nu’u, e pei o se pulufana lele, o se matagi e agi malu mai ma se mana.
O le ala lea o le maualuga o tapu o fa’avae o lenei va nonofo, na ulufatu ma le poto e tua’a ua mavae ma fuafua tatau i le maualuga ma le mamalu o le Atua. Ma o se va tapuia ua tu matila le tosi ina o lona tuaoi, aua o se va e paia ma mamalu. O le ala lea o le maualuga o tapu ma sasa na ulufatu ai lenei osigafeagaiga, ina mamalu ma paia ma ia taataa mala le afioaga. Ma o nisi nei tapu o osigafeagaiga ma auauna a Le Atua:
E tapu ma e sa le faifeau.
E tapu ma e sa lona faletua.
E tapu ma e sa lana fanau.
E tapu ma e sa lona maota.
E tapu ma e sa lona lotoa.
E ola le pagota poo le tagata sulufa’i i lona maota.
E le fa’afesaga’i i tu fa’a lalolagi ma le nu’u i fafo atu o lona lotoa.
O le ala lea o le maualuga o lenei osigafeagaiga, ona e talitonu le nu’u ma tua’a ua mavae, e le agavaa o tatou tagata o le lalolagi ona fa’afeagai ma le tagata o le Atua i fafo atu o lona lotoa. Ae le gata i lea, e le mafai e o tatou mata fa’aletino ona fa’afeagai ma mata fa’aleagaga i se ele’ele le fa’apaiaina.
Aua e ui lava ina o mai sui vaaia o le Atua e militino ma le lalolagi, ae le o o le lalolagi i latou. O le ala lea, na afua ai le aga a le aufaigaluega i aso ua mavae, e maea loa sa na sauniga fa’aleagaga i se aiga o le nuu, ona faamavae lea ma toe fo’i i lona maota. Aua sa le mafai ona talisua fa’atasi ma le aiga pe faafesagai ma le aiga i ni aga faale lalolagi.
I le ma le talitonuga a tua’a ua mavae se ia oo mai i nei aso, o le faifeau o le na te faaola le agaga o le tagata, ma o mea uma na te faia, e faaleagaga ia. O le ala lea e le mafai ai e faifeau, ona taumafa pe fai se fa’afesagaiga i malae ma aiga ma nuu. Ae peita’i e susu lava i lona maota ma lona lotoa e talisua ai.
O le ala lea o le to le ie o le galuega, ma to lona inati, ma momoli i ona lotoa, ona e le agava’a o tatou tagata fa’ale lalolagi ona talisua ma ia, i tuapa o lona lotoa. Ma e faatili mea sili ma ulua’i fua o le eleele i le auauna a le Atua i aso ua mavae.
Ma o le ulufatuina lena o lenei osigafeagaiga i ona tapu ma ona sa e tuaa ua mavae, ona sa matau i le mamalu ma le paia ma le maualuga o le auauna a le Atua.
Lavasiga o lenei osigafeagaiga i aso nei.
O lenei talitonuga, o le a faavae i aafiaga o peau laga o le taifana’e. E i ai le talitonuga o lo’o tumau pea le puipui ma le fa’amamalu o afio’aga i tapu o lenei osigafeagaiga. Ae peita’i, ua i ai suiga o le va nonofo ai, ma ua i ai le talitonuga ua tele felavasa’i ma le fesopoa’i lenei osigafeagaiga po’o le va nonofo, ona ua le tausisia e itu e lua tapu o lenei osigafeagaiga.
Ma ua mafua lenei lavasiga, ona ua le mulimulitaia le alafua na ulufatu e tuaa ua mavae, e tausi ma puipui ai lenei va nonofo. Ua posiga le silasila, ma ua mafuli ma fananau nisi o le Aufaigaluega i le itu faaletino o le galuega, ae fa’atuatuana’i lona tagata fa’ale Agaga.
E faaauau pea
