E tele tamā ta’uta’ua o le lalolagi, ae faatāua tamā sa finauina le malo tutoatasi o Samoa. Ta te momoo, maimau e, pe ana mafai ona ou faatalofa i ai ma se’i momoli se faafetai. O Samoa, ua lauiloa i le lalolagi, ae sa totogi i o latou toto lo ta saolotoga. Toeitiiti foi leai se vaipanoa o le lalolagi e lē laumanu’ia mai ai se Samoa saili malo.
Ae talofa, e iai foi tamā faaletonuga, e tai le misi le masina ma tala aave mai i le matagā o amioga a nisi, ua toe amioleaga lava ia latou fanau teine. O nisi e fiafia e tafasi taitoalua, e mimita. O nisi foi e feofeoa’i solo, e lē tausia lelei aiga. Ui i lea, e tele atu tamā lelei i nuu ma ekalesia e faalēamanaia, ae faamaoni lo latou tauaveina o le tofi ‘tamā,’ e pei o nisi ua faasoa mai le alofa faatamā mo a’u.
Fanaufouina, toe Faifeau
O Tavale Matai’a sa fai ma faatonu o le YFC. Sa ia faamalamalama le iuga o le fanaufouina ia Iesu, ma ou molimauina ai ni suiga tāua o lo’u olaga talavou. E lei atoatoa, ae pei ua tosina atili lo ta loto i le Atua. E tele faifeau iloga sa faafailele e lenei tamā o latou olaga. Ma le tamā faifeau ia Ene Sagala e telē lona sao i lo’u faatagata-matuaina faaleagaga. E amio Atua. Ua maliu, ae toatele nisi na aiaina lo latou faatuatua e lenei tamā. E agamālie, loto mamā, ma e lē fefe e tautala i le amiotonu.
Tele auauna matutua ua soosoo tau’au ma fefaasoaa’i mo le atina’eina o Ekalesia. Ae tulaga ese Iliafi Esera. O se tamā faaaogāina, ae sili lona loto fesoasoani e atina’e ekalesia a le Atua. O fautuaga ma apoapoaiga mo a’u, e tāua mo lo’u valaauina. E loloto lana faautautaga ma faamalie loto lana tofa faale-Atua. O le Taitai o taitai ma le Faifeau o faifeau.
O Mesako Sanerivi, ua maliu. O se tamā tauivi toe lototele. E tele tala sa ou faalogo sa fai e tagata, ae ina ua ou mafuta i ai, sa fesilisili lo’u mafaufau, o fea ea e omai ai faamatalaga e uiga i lenei toeaina? Auā e agamalu, toe fai mea lelei. E finafinau toe sogasogā.
O le susuga ia Talosaga Kome, na te lu’itauina a’u ia matuā tatalo ma ola faatuatua. Ua ou vaai i faailoga o tauave i lona tino ona o le tatalo. O Ioane Polutele, o le taitai-matagaluega, e lē faatauvaa lona faatoatoa i le galuega a le Atua. O se tamā finau ae faatupu manatu ana saunoaga.
Faith City ma le LMS
E uiga mālie tamā matutua o le ekalesia, e alolofa ia maua ma le fanau. E fai mea fiafia, ta te lē taumateina, e lotolelei. O nisi e pei ni uso pe a talanoa. E taliē ma fesuata’i, ae ese ma le tausi faifeau. Ta te mafanafana pe a mafuta ma latou ma le tatalo faafetai, ua maua ni tamā e tausoaina le avega.
O le faifeau LMS o Fiavaai Solomona sa tausinuu i Sapo’e. E sinasina lona lauao. O aso o o’u laitiiti, sa ou manatu, ai o le Atua lea. E lē gaoiā, ae sāo ma silamiō le nuu ma le pulega pe a lauga le faifeau. Ou te manatua, o inā sa tupu ai se lagona i lo’u loto, fia faapei o le toeaina lea, pe a ou matua. E mamalu ana saunoaga, ae toeitiiti vaiaso uma e asiasi ane ma tatalo mo le tina o si o’u tamā, e po lana vaai. E ui na ausage ma toaitiiti lana Ekalesia, ae lei faatagā faia lana auaunaga. E alofagia ma faaaloalo i ai le nuu, ona e tamalii.
Uo, Tamā ma le Atalii
E tele a’u uo i isi ekalesia ma faalapotopotoga e galulue ai. Ou te faafetai i le Atua ona o ni uo ou te talitonuina e alolofa faamaoni i le Atua. O uo e lē loto leaga pe ata faia se mea lelei. E fiafia i lo ta alualu mo le Atua. E olioli pe a ou manuia. A iai so’u faaletonu, latou te fautua ma ufiufi lo ta vaivai ia latou tatalo. O uo e lē taulamalama, ae alolofa i lo’u toalua ma faaaloalo i la’u fanau. Ma le anoanoai o isi sa faaaogā e le Atua e auala mai ai lona finagalo lilo i lea taimi mai lea taimi.
O lo’u tamā o Fuimaono Alalatoa Tautalafua Faatili. O lou ‘HERO.’ Tiga le toatele o matou ma nisi sa matou nonofo, e lei faaletonu ona tiutefai. Matou te lei fia aai, leai se isi sa tuli ma le aoga ona ua lē totogia pili aoga. E faamaoni i lana galuega, ma sa sulufai i ai le aiga i faalavelave. A tutupu vevesi, o lana upu e filemu ai le aiga. Sa ou vaaia lona faamaoni i lo’u tina. A iai foi se mea e lē fiafia ai, e talanoa mai lava. Lima tausaga talu ai, sa malaga mai ai lo’u tamā ma matou mafuta, ona fai lea i ai o a matou molimau e pei ona fai i maliu. Sa fai i ai, faalogo, se’i fai atu molimau, a e maliu e te lē toe lagona mai matou. Ona faasolo lea, o uso ma tuafāfine, ae faalogologo si toeaina. Sa ‘ata. Sa tagi foi. O nisi taimi e ‘ata, ae maligi mai ona loimata a o matou faafetai i mea uma sa ia faia mo matou. O lo matou – HERO.
Tamā Faalelagi
E lē mafai na faagalo le alofa o le Atua le Tamā. Na te silafia mea uma tatou te mafatia ai. O le tu i luga ma le nofo i lalo, e oo lava i lauulu, na te faitaulia. O lona lava faatusa na faia ai tatou ma le manatu maualuga, ia toe iu atu tatou uma ia te ia. O le tamā o ē mātuaoti. O le tamā e manuia uma ai tamā o le lalolagi. E faamaoni ma tausi i ana folafolaga. O le tamā o lo tatou Alii o Iesu, ua ia ta’u i tatou – o lana fanau.
Soifua ma ia manuia le Aso Sa o Tamā!
