O Iuni o le tausaga nei na lauina ai le faaiuga a le faamasinoga maualuga faasaga i alii e toalua o Hynie Godinet ma Joseph Iefata na faamaonia e se laulau o faatonu lo la moliaga o le fasioti tagata pa‘ivalea, e mafua i le maliu o Manu Laumea o se alii o le auvolipolo a Amerika Samoa.
Na malaga mai lea auvolipolo e tausinio i se taamilosaga volipolo i Apia a o faamanatu le Tutoatasi o le atunuu ia Iuni o le tausaga ua mavae 2010.
O le faamaonia o lo la moliaga na faasalaina ai e le Faamasinoga Maualuga le alii o Hynie i le 4 tausaga ma le ono masina i le falepuipui, ae o le alii o Joseph na faasala i le 3 tausaga.
Peitai o le faaiuga lea na mafua ai ona talosaga le itu a leoleo sa tauaveina e Loia a le Malo i le Faamasinoga o Talosaga Apili poo le faamasinoga o talosaga toe iloilo, ina ia toe iloilo le faasalaga ona ua lē sa‘o ma ua lē tausisia taiala a le faamasinoga e faia ai se faaiuga talafeagai mo ia alii ma le solitulafono na la aafia ai.
O le toe finauina o lea tulaga na tauaveina ai e se alii loia mai Niu Sila o Kieran Raftery ma le tamaitai loia o Precious Chang le itu a leoleo, ae o le tamaitai loia o Rosella Papalii Viane ma Semi Leung Wai mo le itu a Hynie ma Joseph o ni taulelea talavou mai le nuu o Vaiusu. I le finauga a loia a le Malo sa finauina le tatau i le faamasinoga ona silasila i le ogaoga o le gaioiga ma le solitulafono na aafia ai i laua ua molia ma faasalaina.
I le silasila a le alii faamasino o le Faamasinoga o Talosaga Apili, sa tatau ona amata se fua o le faasalaga mo ia alii i le 10 ma le 12 tausaga.
Ua ioe foi le Faamasinoga o Talosaga Apili sa tatau ona silasila le Faamasinoga Maualuga i taiala o se tasi o faamasinoga e tai foliga tutusa lava ma le solitulafono na faia e Hynie ma Joseph.
O le faaiuga ua taunuu i ai le Faamasinoga Apili ua soloia ma faalēaogāina ai le faaiuga na faia e le Faamasinoga Maualuga ae faia se isi faaiuga fou.
O le alii o Hynie Godinet na amata le fua a le Faamasinoga o Talosaga Apili i le sefulu tausaga, toesea le lua tausaga ma le ono masina mo vaega tāua sa silasila i ai le Faamasinoga Maualuga i lana iuga muamua, ma toe toesea le isi 4 masina ona o le salatupe na totogi e lē ua molia i le faasalaga a le nuu ia te ia, ona totoe ai lea o le 7 tausaga ma le 2 masina e nofosala ai i le falepuipui.
Mo le alii o Joseph Iefata e sefulu foi tausaga na amata ai le fua, toesea le 4 tausaga ona o itu lelei sa silasila i ai le Faamasinoga Maualuga i le faaiuga na faia muamua, toesea ma le isi masina o le salatupe sa totogi e Joseph ina ua faasala e lo latou nuu, ma totoe ai tausaga e 5 ma masina e 8 ua nofosala ai i le falepuipui.
A fua i le faasalaga na faia muamua e tusa ua faaopoopo le tolu tausaga mo le faasalaga o Hynie ae o Joseph ua faaopoopo le lua tausaga ma le valu masina.
