O le finagalo lea o le Minisita o Tagata Tafafao Maimoa Mai Fafo, le Alii Palemia foi lea ina ua fesiligia pe aisea ua lē faatautaia atoa ai le tauvaga e saili ai se tausala o Samoa i le Gagana Samoa.
O le mataupu na lāgā e tusitala o le Leitio Polenisia i le fono e tasi a tusitala Samoa ma tamaitai tauva o le sailiga o le Tausala o Samoa i le vaiaso o le Teuila.
Na fesiligia e tusitala nei nisi o tamaitai e lē o lelei le faa-Samoa ma lagalaga ai loa pe aisea ua lē faatāua ai le gagana a Samoa i lenei tauvaga.
O le faaaliga a le Alii Palemia o tausinioga i le sailiga o le tausala e tāua tele ai le faaaogā o le Gagana Peretania aemaise o le taumafaiga e unai le faalauiloa o Samoa i isi atumotu o le Pasefika poo isi atunuu faavaomalo.
O le manaoga lea e tatau ai ona faatāua le Gagana Peretania. E tāua le gagana Samoa ae a oo loa i tausinioga faavaomalo na faaalia e le Palemia, e tāua foi le iloa e tamaitai o le Gagana Samoa auā o i latou o le a fai ma amepasa o Samoa i le faalauiloaina o le atunuu.
O le faasilasilaga na aumai lava e le Pule Sili o le Pulega o Tagata Tafafao Maimoa mai i fafo i le amataga o le Vaiaso – o le Tausala o Samoa o loo faaaogāina ai le Gagana Peretania o le gagana aloaia lea mo lea faamoemoe. Faaalia e le Tamaitai Pule ia Matatamalii Sonja Hunter, o le Gagana Peretania lava e tele ina faaaogā i lenei tauvaga i tausaga taitasi.
O le faagasolo ai o polokalame a le Ofisa o Tagata Tafafao Maimoa Mai Fafo i tamaitai e toaono e saili ai le Tausala na aofia ai asiasiga i nofoaga o tagata matutua, falemai o fanau i Motootua ma le faamautu ai o palota i luga o le internet.
E tele isi vaega o le atunuu na asia e nei tamaitai aemaise o le faalauiloa ai o mataupu ua lagalaga pea i lenei vaitau e saunoa i ai tamaitai. O le vaega lea o le tauvaga ua faapea foi ona faatino i le gagana Peretania ma e faitaulia i le tauvaga atoa.
O le siosiomaga ma le aafiaga i atumotu laiti o le Pasefika e pei o Samoa, o le faatuputupulaia o faama‘i lē pipisi, o le tulaga o iai tupulaga o Samoa ma suiga o lenei talutalufou, o ia mataupu uma ua laga ma talanoa i ai ia tamaitai i le sailiga ai o se tamaitai e talafeagai ona avea ma sui o le atunuu i le sailiga tausala.
I le faagasologa o manatu faaalia lea na muamua ai le tausala a le fale taavale a le Singapore ma na ia talanoa i le Soifua Maloloina.
I lana folasaga na ia faamamafa ai le tāua o le ola maloloina o le tagata soifua i soo se itu auā a lē atoa ia vaega, o le a lē maua foi se ola fiafia ma o le a lē gata ina vaivai ai le mafaufau ae faapea foi ma le agaga.
Na ia afea foi le tatau i tina ona fuafua lelei le va o fanau auā o se tasi lea o mafuaaga o le lē maua e nisi o le fanau o le ola maloloina aemaise o le tina, ma o le aiga foi e amata mai ai le a‘oa‘oina o le Soifua Maloloina.
Na faaalia e le tausala a le Singapore afai ae pale mai i le tauvaga, o le a ia taumafai e faalauiloa auala uma e a‘oa‘o ai tina uma o le atunuu i auala eseese e fuafua lelei ai le va o fanau.
O le tausala o Samoa mai Ausetalia na lona lua i lea faaaliga manatu ma na ia talanoa i le aogā o tomai faatekonolosi i le atina‘eina o Samoa.
I le saunoaga a le tamaitai ia Rebecca Sutherton na ia ta‘ua ai e ui ina iai nisi o itu e lē lelei ai auala o fesootaiga faatekonolosi ia Samoa e pei o le telefoni ma le initaneti, ae e faalagolago lava i le tagata ma lona faaaogāina. Ae na ia ta‘ua o se tasi o aogā o lenei auaunaga ona ua mafai ai ona fesootai aiga i Samoa nei ma o latou aiga i atunuu i fafo i se taimi vave pe a faatusa atu i aso ua mavae.
O le tamaitai ia Philomena Tiufea Vaa le tausala o le Apia Business Machines na lona tolu i ai ma na ia saunoa i le Siosiomaga ma ona aafiaga faatasi ai ma itu e tatau ona faia e le atunuu e foia ai faafitauli o loo tulai mai i le Siosiomaga.
E tele ni itu na afea e lea tamaitai i lana saunoaga ae na ia faamamafa lava le lē tatau ai lea i le atunuu ona soona tatuu le vaomatua auā o le a telē sona aafiaga e pei o le tafia ai o le palapala ma nisi itu peitai na ia ta‘ua afai o le a faapaleina o ia e avea ma tausala o Samoa, o le a ia taumafai i lona malosi e gata ai e faalauiloa i luga o televise ma isi ala o faasalalauga auala e tatau ona faatino e le atunuu e tuuitiitia ai le faaleagaina o le Siosiomaga.
O le tausala o le Bermagnes Sewing Shop ia Agnes Sitagata na sosoo ai lana tautalaga ma na ia talanoa i le autū o le Turisi. I lana saunoaga na ia faaalia ai o le atina‘e lenei o le turisi ua faamauina o se tasi lea o alagatupe tele a Samoa ma na ia faamamafa ai le tatau i tagata uma o le atunuu ona faaalia pea laufofoga fiafia i taimi uma aemaise lava ia i latou o loo faigaluega i faletalimalo ma pisinisi tau turisi ona o se tasi lea o talaave e ala ai ona toatele tagata tafafao maimoa mai i si o tatou atunuu.
“O le auga tonu lea o le faamanatuina o le Teuila ona o le faatāua pea o tagata tafafao maimoa mai i Samoa auā o le atina‘e lenei o loo tele ai tupe e sasa’a mai mo le atunuu”, o le faaopoopo mai lea a le tamaitai ia Agnes i le taimi o lana saunoaga.
O le tausala a le Faleaiga o le McDonalds le tamaitai ia Ida Tifitifi Fuimaono na talanoa i le faatāua o le ituaiga tagata e iai oe (tama poo le teine). Na ia ta‘ua e toatele tamaitai Samoa ua logologoa o latou tala ona o ni matati‘a na latou ausia ma ua siitia ai foi le tulaga o tamaitai i totonu o Samoa.
I le saunoaga a le tamaitai ia Fuimaono na ia ta‘ua ai nisi o nei tamaitai e pei o tala mai anamua i le tamaitai ia Salamasina lea na ia umia Papa e fa o Samoa. E lē gata i lea ae o Samoa foi le atunuu muamua o le atu Pasefika na uluai avea ai se tamaitai ma Faipule faatasi ai ma nisi o tina na ausia ni matati‘a na tolalau e le tamaitai ia Ida Fuimaono.
O le sui tauva na taualuga i ai lea faamoemoe o le tausala o le Teine o le Mau Creations le tamaitai ia Olevia Ioane ma na ia talanoa i le tāua o A‘oa‘oga o le poto salalau ia Samoa ma ona tagata. I le folasaga a le tamaitai ia Ioane na ia ta‘ua ai o le faitotoa muamua lava lea o le olaga o soo se tagata ma e aiā tutusa uma i ai tagata, o le tatau lea ona maua le avanoa e a‘oa‘oina ai i le poto salalau.
O lea faatasiga na molimauina ai le faatumulia i le fanau aoga i le fia faalogologo i mataupu na talaonoaina e tamaitai tauva auā o le a aogā foi i le faagasolo ai o a‘oa‘oga a le fanau.
