O le tele o le olaga o le tupulaga talavou mai lava i le laiti sa ave ai lava le faamamafa i tu ma aga ua soifua ai soo se tama ma se teine, o ia e na o le filemu lava, e leai se tala e soona faia pe a potopoto tagata matutua e fai ni talanoaga.
O se faiga ua masani ai lava lo tatou atunuu ae ua vaaia suiga i lenei talutalufou, o le fesootaiga faavaomalo ma malo ua vaavaai i le tutoatasi ai o Samoa ma le faamalosia o faigamalo faatemokarasi ua lagalaga ai foi ma le tāua o le sao o tagata uma e aofia ai tupulaga talavou i atina‘e o atunuu eseese.
O le Malo o Samoa ua tele lana lagolago i le taumafaiga e atina‘e tupulaga e pei ona iai le vaega mo mataupu a tupulaga i le Matagaluega o Mataupu Tau Tina ma Tamaitai, Atina‘e o Nuu ma Agafesootai.
Ua iai nei la se faiga faavae ua pasia e le Kapeneta ina ia unai ai se leo o tupulaga i totonu o faiga filifiliga a Afioaga.
Ua faaigoaina i latou nei o sui o le Malo.
O le vaiaso na tea nei na talanoaina ai tulafono ma aiaiga o le filifilia ai o ni sui o le Malo mai tupulaga i nuu taitasi, o le sini autū lea o se fonotaga sa faatautaia i le Maota o le Tooa Salamasina i Sogi.
O le faatautaia ai o lea fonotaga na auai faatasi ai sui o le malo (pulenuu), pulega a alii ma faipule faapea sui o tamaitai i nuu taitasi i le soalaupuleina o tulafono auā le faavaeina o le Faalapotopotoga a sui o le Malo mai le tupulaga.
I lea mafutaga na ta‘ua ai e iai lava aiaiga ua tuuina atu i nuu mavae ma nuu e leai ni faiga nuu ma e tuu atu lava le faitalia i alii ma faipule pe filifili e latou se sui o tupulaga pe filifili e tupulaga so latou lava sui.
“O le faamoemoe autū o le faatu ai o lea faalapotopotoga ina ia iai se leo o tupulaga i faaiuga fai a nuu ma afioaga faapea ma le Malo, e ui ina leai se saofaiga a tupulaga i totonu o faiga nuu ae o se tasi lea o auala e faaleo ai so latou manatu”, o le saunoaga lea a Eric Tuiataga Poe, o lē o loo vaaia poloketi a le Ofisa o Tupulaga.
E pei ona tatou silafia ua tele faafitauli e tulai mai i tupulaga i nei ona po ma ua a‘e ai se tofa i le Matagaluega ina ia faatu se faalapotopotoga faapenei atonu e avea lea ma auala e tuufaatasia ai tupulaga uma o Ekalesia i totonu o afioaga taitasi o le atunuu.
O lenei polokalame na ta‘ua e Tuiataga na amata ona faatalatalanoa mai i le tausaga e 2009 ae o lea faato‘ā tino mai.
Na ia ta‘ua foi o nisi o aiaiga o lenei polokalame e na o tupulaga o loo nonofo lava i totonu o nuu ae e lē taulia ai i latou o loo nonofo i isi afioaga ae faato‘ā faimalaga lava i o latou nuu pe a oo i le faaiuga o le vaiaso.
Na faaalia foi ni manatu o nisi o tamalii na auai i lea fono, pe faamata o le a totogi nei sui o le tupulaga e pei o pulenuu ma sui o tamaitai ae na saunoa Tuiataga, o loo iai le faamoemoe o le Faalapotopotoga e tuuina atu ni taui tupe pe totogi foi nei sui ae e lē o le taimi nei se‘i amata ona tagai lea i ai o le latou komiti i le faia o ni totogi mo sui o le a tuuina atu.
O loo iai foi le faamoemeo o le a taitoalua mai sui o afioaga pe a solosolo lelei pea le latou faamoemoe ona o le taimi nei, e na o le taitoatasi sui lea ua faamautu mai e tatau ona resitala atu.
O loo tālia nei le faamautuina o tulafono o lea Faalapotopotoga pe a mae‘a mai le faatalatalanoaga lea o le a faia i le motu tele i Salafai, ma o le aso 19 o Setema agai atu i le aso 30 e amata resitala ai sui o le Malo mai tupulaga i nuu taitasi ma e amata atu i le 18 tausaga agai i le 35 tausaga le matutua e faatagaina.
