O le manumalo o le tuugafautasi o le Tutoatasi o le tausaga nei, lea foi ua toe sola ma le manumalo o le tuugafautasi o le Teuila mo le taimi muamua, le Tolotolo o Tama Uli mai i le afioaga o Salelologa i le motu tele i Salafai.
E ui i le suiga o le alavaa o le tuuga o lenei Teuila, e lei faavaivai ai tama o Salelologa i le naunau ina ia sola le manumalo o le Tutoatasi ia Iuni.
O le suiga o le alavaa na amata ona to atu le tuuga i Sogi agai ai i Saina ma Toamua
toe liliu mai ai loa. E umi atu nai i lo isi tuuga sa masani ai auā e toe faatini mai lava i Vaisigano.
E pei ona silafia e le atunuu o le suiga lenei na faia e le Ofisa o Tagata Tafafao maimoa mai fafo mo le tuuga o lenei tausaga ona na latou faailoa mai, o se suiga ua faia e sui ai foi le vaai i le tuuga o le Teuila o le 2011. Ua faailoa mai foi ua siitia le faailoga tupe o le tuuga o lenei tausaga i le $25,000 ma o lea ua suipi ai le Tolotolo i lea faailoga.
Na vaaia le faatumulia o taligalu i le taulaga o Apia i lea taeao o le Aso Tofi (taimi Samoa) i le mamalu o le atunuu ona o le fia maimoa i lea foi faagatama auā e pei o le taaloga lea e mataitu e tagata uma i Aso faapitoa faapenei.
E valu fautasi na resitalaina ma auai i le tuuga peitai e lei umi na amata le tuuga ae pa‘ulia loa le sa o le Digicel Segavao lea o loo alo e tamafanau a le Aoga Matata Eseese o Don Bosco ma na o le fitu ai sa na taunuu i tini o lea tuuga.
O sa la nei e fitu e aofia ai le sa e tasi mai le motu tele i Salafai le Tolotolo o Tama Uli mai Salelologa, o le sa mai Sinamoga ma Moamoa, o le Lupe o le Soaga mai Magiagi, le Little Rina mai Apia, La o Samoa mai Lepea ma sa e lua mai Manono o le Fetu o le Moana 1 ma le Fetu o le Moana 2.
E pei ona silafia o le sa lenei o le Digicel Segavao lea ua lē manuia la latou taumafaiga i lenei tausaga ona ua pa‘ulia na sola ma le manumalo o le tuugafautasi o le Teuila i le tausaga na tea nei (2010) ma na faaalia ai le lagona faanoanoa o nisi o lea auvaa ona ua lē mafai ona tini le faamoemoe sa latou tapena ai mo le fia masina talu ai.
E ui i ia lagona faanoanoa ae na latou faaalia o le a lē faavaivai ai le latou pulega ae o le a toe taumafai mai i le tausaga fou.
E ui la i le faanoanoa ai o le Segavao ae o le nofoaga o Mulinuu na api ai le auvaa mai i Savaii na faatumulia i le leo o le fiafia a o agai mai le auvaa a le Tolotolo o Tama Uli ona ua a‘e ma le malo la latou tauasa mamao mai i le fia tauva ai i le tuugafautasi o le Teuila o lenei tausaga.
Na ta‘ua e le kapeteni o le sa lenei, o Pauli Ivan Williams, o se tuuga faigata tele lenei ia i latou pe a fua i ai i le tuuga o le faamanatuina o le Tutoatasi i nai masina ua mavae.
“E fai si faigata o le tuuga lenei o le Teuila i le matou auvaa ona o le fausaga o le vaa o le fausaga Samoa moni ma e ese mai i isi vaa ia na matou tauva toe faaopoopo i ai ma suiga lea ua faia e le Ofisa o Turisi i le vaega e amata ai le tuuga”.
Na faaalia foi e Pauli sa taumafai lava ia latou tapenaga i ituaiga metotia eseese ona o nei suiga laiti o le tuuga peitai e lei avea lea ma ala e faavaivai ai le taumafaiga a lana auvaa ma na ia ta‘ua foi o le latou sa e tusa lava po o le ā le ituaiga tau e alo ai, e lē fefe ai ona o loo faamuamua ia i latou le tapuaiga a Salelologa aemaise o Salafai atoa.
Faaalia e Pauli o le toatele o lana auvaa e fou ma o se tasi lea o itu na ia mataitu i le taimi o toleniga ina ia lava le mānava. Na ia ta‘ua foi e lē o iai se mafaufau pe toe tauva i le tausaga fou ae o le a faailoa mai lava i se taimi o i luma.
Na faafetaia foi e Pauli le lagolagosua a le afioaga i Salelologa i tupu ma e‘e aemaise o tamafanau a le afioaga o loo ta‘ape ma salalau i atunuu mamao faapea foi ma le tapuaiga a Savaii atoa ona o lea ua iu ma le manuia la latou taumafaiga.
Mautu le lagolago a le Tolotolo o Tama Uli mo le Teuila 2012
Ua faamautu mai foi la e le Kamupani Telefoni o le BlueSky SamoaTel lona lagolagoina o le fautasi a le Tolotolo o Tama Uli mai Salelologa i tuugafautasi o le tausaga fou i le mae‘a ai o le tuuga o le Teuila o lenei tausaga ma manino le sola o lea auvaa ma le manumalo.
I se feiloaiga a tusitala ma le Pulega a le BlueS ky SamoaTel faapea le auvaa a le Tolotolo o Tama Uli i Apia i le vaiaso ua tea, na faaalia ai le agaga faafetai o le kapeteni ia Pauli Ivan Williams ona o lea lagolago ua mautu mo le latou fautasi.
Faaalia e Pauli Ivan, o le faanaunautaiga lea sa taumafai lava i ai o ia ma lana auvaa, ina ia manumalo i le Teuila o le tausaga nei ma tau lau o le faamoemoe mo le faamanuiaina ai i lea lagolago sa ofoina atu e le Kamupani o le BlueSky.
O le mae‘a o le tuuga na valaaulia faapitoa ai e le BlueSky le auvaa atoa i lona ofisa autū i Maluafou ma foai ai loa lo latou pasese e $1000 tala mo le toe foi atu i Salafai atoa ai ma ni telefoni o le ituaiga o le Samsung ua iai totonu paleni ta‘i $20 tala.
Na tofu uma lava le auvaa e to‘a 70 o loo aofia ai ma le kapeteni ma sui lagolago o le afioaga i ia faamanuiaga ua foai e le BlueSky faatasi ai foi ma ofu o loo lolomi ai le igoa o le Kamupani telefoni.
Na momoli le faamalo a le peresitene poo le Pule Sili o le Kamupani a le BlueSky, Adolfo Montenegro, i le Tolotolo ona o le agaga finau ma le galulue faatasi ua manumalo ai i le tuuga o le Teuila o lenei tausaga. Faaalia le agaga faafetai o le alii kapeteni ia Pauli Ivan mo le foai ua tauaao e le BlueSky mo i latou, faapea le lagolago ua faamautu mo le tausaga fou.
E tumau pea ma o loo iai le talitonuga o le Kamupani telefoni e fesoasoani ai i ana paaga o loo nonofo i le motu i Salafai ma o se tasi lea o ana lagolago tāua mo ana paaga uma.
