O le malumalu o le ekalesia EFKS i Nofoalii sa faia ai toe sauniga faaiu o le tamaitai 17 tausaga le matua o Lei‘a Misa, lea e lua tausaga o faataotolia i lona gasegase o fatuga‘o ma ua iu ai lava lona ola.
O molimau o lona olaga faateineitiiti mai lona laitiiti seia oo ina ulufale i aoaoga na folasia e ona mātua. O le molimau a lona tina, e lei mafaufauina o le a maua si ana tama teine i se gasegase faigata.
Na amata ona nofo ma le aoga Lei‘a ina ua oo i le vasega tausaga 11 ma o le molimau a se tasi o tamaitai faiaoga sa avea ma sui o le Pule aoga o le Kolisi o Leulumoega sa aoaoina ai Lei‘a, o se tamaitai e tausaafia ma amio lelei. Ua misia uma e lana vasega ina ua maua tala ua lē toe mafai ona oo atu i le aoga ona ua ma‘i.
O se tasi o ona uso matua sa tele ina nonofo ma lona tina i le falemai e tausi le gasegase o Lei‘a, sa molimau ma loifofoga maligi ona e faigata le la mafutaga auā o le tele o taimi o le la mafutaga e ita lava lona uso ia te ia, ae na te lē iloa pe aisea.
O taimi uma e alu ai e faigaluega e lata loa i le 2 i le aoauli faasolo i le 4 i le afiafi, tatagi lana telefoni o Lei‘a ua valaau atu a mānava ona alu atu lea ma sana meaai poo se pizza. Peitai o taimi uma e alu atu ma meaai e taunuu atu na ona tilotilo lava i ai, ae lē faaaogāina.
O le molimau foi a si ona tina, e tele ina lau lona lē alofa ma lau atu lona lē mafai ona finau mo lona ma‘i. O se molimau ola lea o le naunau o Lei‘a e fia maua se malosi e faaauau ai lana aoga aemaise ia toe foi i le tulaga sa iai lona olaga faateineitiiti i totonu o lona aiga.
Na molimau le tamā o Misa ma ia faamatala le olaga o lona afafine a o laitiiti e fiafia tele la te toalua i ana galuega faatamā i le aiga. A tuli i uta e aumai ni fafie o le umukuka e augofie, ae a fai atu i se feau faateine e musu tele, ona ua masani i le olaga sa ia koleni mai ai Lei‘a a o itiiti.
Na molimau le faafeagaiga le susuga Tupou Tanielu ma ia faaalia, e na o Lei‘a lava le tagata o lo latou aiga e toaga i le lotu ma le aoga Aso Sa. O nisi aso e asiasi ai i le tamaitai i le falemai, e lei tuuina atu lana meaaalofa tupe, ae ua muamua ane le seleni mai le tina o Lei‘a. E fiu e tetee ae o le tala a le afafine, ave le seleni e faatau ai ni ona seevae.
Fai mai le faifeau o se tagata e aga mālie, ae sa ia molimauina le naunau o Lei‘a e fia maua pea le ola e ui ua lē manuia sailiga togafiti o lona gasegase. E faamomoi loto le tusi a le afafine na ia tusia a o lei uma lona ola.
O loo ia faafetai ai ia i latou uma na agalelei atu i le tau sailiga o se laveai. O le Toomaga mo ē Puapuagatia na latou amata se fesoasoani na matuā liliu mai nisi o le atunuu ma lagolago.
