“O le isi lena a matou manulauti ona ua tele faaletonu ua teva ai le lagolago a le atunuu”
Ua agai nei le pulega lē tumau ua filifilia e le Komiti Faafoe o le lakapi a Samoa e fofo faaletonu ma faafitauli o loo vae manua ai le lotoifale o le Iuni aemaise o le itu tāua o le toe aoao mai o le lagolago a le atunuu e lē gata i Samoa, a o atunuu i fafo.
“O le tasi lena o a matou manulauti ona ua tele faaletonu ua teva ai le lagolago a le atunuu”. O se finagalo lea o le sooupu filifilia le susuga Tamaleta Taimang Jensen, ina ua valaauina se feiloaiga ma tusitala i le faaiuga o le vaiaso ua mavae.
O se feiloaiga foi e lē gata ina faailoa ai fuafuaga a le laulau fou ae ua faamautu mai ai se tasi o faaletonu sa feagai ma le iuni, o le tuli gata e le au faasalalau ma tusitala mo ni manatu faaalia pe a oo ina mapuna mai i fafo ni feteenaiga i totonu o le gataifale o le iuni lakapi a Samoa, aemaise pe a aliali ni lagona lagomia o tama lakapi ma pulega o au lakapi faavaomalo a le atunuu e aofia ai le aulakapi taitoafitu ma le Manu Samoa.
“O lea ua matou o mai matou vaavaai atu o le isi lea mea tāua e tatau ona galulue e faaleleia o le itu i le communication, e lē gata i le va o le Iuni ma tama taaalo, ae faapena foi i le atunuu lautele, saunoa ai Faleomavaega.
Na faaopoopo mai le sooupu le susuga Tamaleta i le vaega lea ma ia faaalia, o le tasi o itu tāua e ao ona galulue e faaleleia o le va ma le aufaasalalau.
“Masalo o le isi lea itu auā o le tele o taimi e tou te frustrated, ae o le a avanoa lava i matou i soo se taimi e tali atu. O le a faailoa atu foi matou telefoni tou te fesootai mai ai”.
Mo le silafia e le au faitau ma le atunuu o le isi lava lea o aitu tuli gata i totonu o le pulega o le Iuni lakapi, o le faigata ona mautali mai i ni faafesili pe a oo ina malomaloā mai ni mataupu ua oia ai le lotoifale o le lakapi i le va ma tama taaalo.
O pulega o le Iuni ua mavae, sa tuu tasi uma mataupu e tali mai i ai le taitaifono le afioga i le Palemia susuga Tuilaepa L Sailele Malielegaoi.
Tapenaga i le taaloga a le All Blacks ma le Manu Samoa
O le itu tāua lea o le taualuga o vaega o loo tapena nei i ai le pulega fou faavaitaimi, o le taaloga a le Manu Samoa ma le Olopeleki a Niu Sila.
Faaalia e Tamaleta Taimang Jensen, o loo manaomia seleni mo tapenaga aemaise o loo iai foi isi aulakapi a le atunuu o loo sauni mo nisi o taamilosaga faavaomalo. “O le taimi nei o loo lagolago mai paaga masani a le Iuni e pei o pisinisi ma sponsor mai fafo, ae e manaomia lava seleni”.
O se vaegatupe e silia i le $2,000,0000, miliona o loo tilotilo le Iuni e faatupe ai polokalame uma o le taaloga i le masina o Iulai i le va o le Manu Samoa ma le Olopeleki, peitai na fesili i le sooupu pe lē o silasila e tapa mai i le atunuu mo se sailigatupe. “O le taimi nei e lē o iai se tulaga faapena”, na saunoa mai ai le sooupu. O le faatauina o pepa ulufale mo lea taaloga na faaalia e Tamaleta e lei mautu i le taimi nei pe fia le tau o le pepa ulufale, ae ua ia faailoa e iai se taimi ona faailoa lea mo le silafia e le atunuu.
O le feiloaiga a le Taitaifono le afioga i le Palemia ma tusitala i le Aso Tofi ua mavae na faaalia ai e Tuilaepa masalo e lē umi ona tatala le faatauina o pepa ae uma, ona e lē tele se avanoa mo le aumaimoa pe a fua i malae lakapi tetele i fafo.
Faaalia e le taitaifono ua tuu uma i lalo fale taaalo i le Apia Park Stadium ma galulue nei le aukonekarate faufale mai Saina mo le toe fausia ma faanumera nofoa, auā o le isi lea tulaga tāua e manaomia a o lei faatauina pepa mo lea taaloga faavaomalo.
I le itu i se tupe maua a le Iuni lakapi a Samoa mai lea taaloga, na faaalia e Tamaleta ua mae‘a ona sainia le feagaiga ma le Iuni lakapi a Niu Sila ma e lei oo i le taimi e oo atu ai i le pulega o le iuni faamatalaga o lea feagaiga.
Peitai na pau le itu ua faamautu mai, o tupe maua mai le faitotoa poo le gate collection o le a vaelua ai le iuni lakapi a Samoa ma le iuni a Niu Sila. O tupe mai le faasalalauina o le taaloga i fafo atu o Samoa o le a aoina e le Iuni a le atunuu.
E ui e lei mautu pe maua ai se seleni mamā a le Iuni lakapi a Samoa peitai na faaalia e Tamaleta o loo silasila pea i se faiga e mafai ona mae‘a ai lea taaloga faitaulia e maua sina seleni mamā poo se polofiti, poo le leai foi ae ia leai se vaega e nofo aitalafu ai le Iuni lakapi a le atunuu.
Ua faamaulalo mai le pulega lē tumau i le atunuu pe afai ua iai ni aleu ma ni faaletonu o le Iuni, ae o loo silasila nei i se tulaga e toe faaleleia ai faaletonu.
O le pulega lē tumau ua iai nei na filifilia e le Komiti Faafoe i sana fono faanatinati i le Aso Lulu ua mavae, ina ua faafuasei ona faamavae le Pule Sili le susuga Fred Amoa ma le Pule o le HPU le afioga Tuala Mathew Vaea.
