Faamavae leoleo tamaitai sinia o Tafaigata – Peresia Patu
Ua faailoa mai i le tatou ofisa i Apia le faamavaega a se tasi o tamaitai sinia ua tele tausaga o galue o se taitai leoleo i le Falepuipui o Tamaitai i Tafaigata o ia lea ia Peresia Patu.
O lea ua agiga ni suesuega ua faatautaia i totonu o le falepuipui i le tele o faaseā ua laga ai e lē gata i Taavale na ave faagaoi ma maua mai i le lotoā o le falepuipui ae o leoleo foi ia ua faapea ona faatauina ia taavale. E 6 taavale ia ua toe faafoi ia Leiataua James Arp o le Samoana Rentals ma lona tuafafine e ana se faletaavale totogi aso i Fugalei o le National Rental Cars.
O le faamatalaga ua tuuina mai o le matuā tele lava o isi taavale ia ua faapea ona maua ai i lea nofoaga. Ua iai faamatalaga ua faalele e le tamaitai pagota e fesootai ma nei taavale ma lana uo na faatau atu taavale gaoi nei i sui o le falepuipui.
O lana faamatalaga e tusa ma le to‘a 20 leoleo e aafia ai i lenei mataupu. Ua tautala Vaioleti Stowers i le ita tele i le faasalalau o lona sola ese mai i le toese i le vaiaso na tea nei. Faaalia e lenei tamaitai e lei sola ese lava mai i le toese. O ia na tatala i tua ma o loo malamalama uma lava leoleo i le tatala o ia i tua.
Ta‘ua e lenei tamaitai na toe foi lava ia i le toese ina ua faalogo atu i luga o le TV ua faasalalau mai ai o ia ua sola ese. Na ave lea tamaitai ua lē taofia i le toese i Tafaigata ae ua ave taofi i le ofisa Tutotonu o Leoleo i Apia, ma o iina lea na tatala mai ai i le aso ananafi e tulai i luma o le Faamasinoga Maualuga.
O ia ma le tamaloa papalagi ia Grant Holland lea ua molia i le ave o taavale totogi aso toe faatau atu i leoleo o le falepuipui ma o se uo a le tamaitai lenei o Vaioleti Stowers.
O loo ua malaga atu i Ausetalia le alii taitai leoleo poo le Komesina Lagolago o le Falepuipui ia Tunai Faiesea ma lona aiga mo malologa, ae o lona suafa lea ua tele ina fesootai i nei fesootaiga aemaise o taavale o loo faapea ona maua mai i le lotoā o le toese.
Ta‘ua e Vaioleti o ia o le a agai i le faamasinoga e faamatala uma mea o loo tutupu i Tafaigata.
O le fesootaiga ma le faamavaega a le tamaitai o Peresia, ua tuua‘ia e Vaioleti lea taitai leoleo i le iloa lelei o mea o loo tutupu i Tafaigata aemaise o loo ua tuua‘ia foi i le tatala ma le toe avatu o Vaioleti i totonu o le toese.
E tele tuua‘iga a le tamaitai pagota lenei ma ua ia ta‘ua le aumai o se tusi i le tatou nusipepa e faamautu uma ai ana tuua‘iga.
E tele suesuega ua faia i le toese i Tafaigata i le taimi lenei i le faalauiloa ai o nei mataupu, ma o loo tālia se tala mai i le Komesina o Falepuipui ona na ia ta‘ua e lē mafai ona tuu mai se faamatalaga ona o loo faia suesuega i nei mataupu i le taimi lenei.
O le aso ananafi lea na tulai ai Vaioleti i luma o le faamasinoga ma ua toe tolopo lana mataupu ma le alii papalagi ia Grant Holland seia oo i le aso 2 o Mati.
