O le lagona lea na faaali e le tamaitai ofisa sili fou o le Faalapotopotoga o Taui o Faalavelave Faafuasei ia Muliagatele Makelita Matafeo. O se tamaitai ua 18 ma le ‘afa tausaga o galue e pulea tupe a le ACC e pei ona silafia ai, ae o lea ua tofia nei e avea ma faauluuluga o lenei faalapotopotoga ma ua sui tulaga i le fetalaiga ia Malaeulu Lose Niumata lea ua 19 tausaga o i lea tofiga a le Malo.
O le mau a lenei tamaitai, o le oo i lenei tulaga ona ua toatele lava sa fautuaina o ia e talosaga i ai, ae o le la va galulue faatasi ai ma le pule ua see ese na ia ta‘ua na ave ai lava lona faatuatuaga i ana taitaiga ma o se tagata na ia faaalia e sa‘o lava le faatinoga o ana galuega ma o se tasi foi e tautala galuega ae lē tele se faamatalaga.
Faaalia e lenei tamaitai o le faafetai ona o lenei tofiga ae o lona lava olaga o le tautua ma le fai o le auaunaga.
O se tasi lenei o ofisa o le Malo e seāseā agai i luga o faasalalauga ma tusitusiga a tusitala, ma na ia ta‘ua e mafua lava ona o le pulega ma ana aiaiga e taumafai ai e aloalo ese mai i le agai i luga o faasalalauga se‘i vaganā lava ua iai se mafuaaga tatau. E ui o lea na maua pea le avanoa e talanoa mai ai i galuega ua faaauau mai i le pulega sa iai ma lona manaoga e faamalosia pea.
“E toatele e faapea mai e leai se galuega a le ACC o faia i le atinae o le malo, ae o loo tele le galuega peitai e tele lava ina ave o se galuega lagolago ma e ave foi i paaga ua iai a le ACC,” o sana faamatalaga lea.
O nei paaga na ta‘ua e le tamaitai Ofisa Sili fou, e aofia ai galuega ua fesoasoani ai le ACC i le Pulega o Felauaiga i le Fogaeleele le Lands Transport Authority poo le LTA lea ua faatau ma faamautu ai e le ACC moli faasino auala (traffic lights).
E lē gata i lea o le fesoasoani i le Matagaluega o le Soifua Maloloina lea ua faatau ai le CT Scan poo le fa‘ata faapitoa mo le sailiga o gasegase. O le fesoasoani ua ofo atu i leoleo ua auala atu i taavale faatau ma meafaigaluega ia e faaaogā e faamānava ai tagata ua masalomia o loo faasuaava ma faafoe taavale.
E lē gata i lea o le fesoasoani i le Matagaluega o Alamanuia ma Leipa e faatautaia ai aoaoga mo ofisa eseese i le atunuu auā le unaia o le saogalemu i totonu o fale faigaluega ma le fesoasoani ua avatu i le Pulega o Tineimu ma Tali o Faalavelave Faafuasei.
O nei galuega uma na ta‘ua e lenei tamaitai ua faamalosia i tausaga taitasi ma ua ese mai i le galuega ma le tiute tauave o lea faalapotopotoga o le avatu o taui ia i latou ua aafia soifua ma faamanualia ona o faalavelave tulai mai i fale faigaluega.
O i latou ua maliliu a o faigaluega e maua foi le fesoasoani mai i le ACC atoa ai ma soo se tasi e maliu i faalavelave tau taavale.
Ta‘ua e lenei tamaitai ua maioio lava faiga faavae a lenei faalapotopotoga ma o le tatalo ia umi ona mafai ona faatautaia lenei auaunaga, ma o ia o le tamaitai lona lua ua tulai mai i le tofi o le taitaiga o le ACC.
Sa ia faaalia o lana taulai ia saogalemu tagata o le atunuu e ala i le auaunaga ua o latou faatautaia, ma e lē o iai se manatu e tele ni suiga o le galuega a le faalapotopotoga lenei ae a iai ni suiga e fia faia, o le a tagai lava i ai ma o le a auga foi i le malupuipuia o soifua o tagata o le atunuu.
O le afioga Muliagatele Makelita Matafeo e mai i le afioaga o Samalaeulu ma Asau i Savaii. Ua faaipoipo atu i le afioga Tagaloasa Sala Uili Matafeo lea ua tele tausaga o avea ma Ofisa Sili Lagolago a le NPF ae ua galue nei o se Ofisa Sili Lagolago o le Pulega o Malaevaalele. E toalua o la alo ma o loo nonofo nei i Aleisa i Sasa‘e. O se tamaitai ua maua mai faailoga o le Bachelor of Business mai i le Iunivesite o La Trobe i Bendigo, Victoria i Ausetalia ma sa amata lava ona galue i le ACC i lona tulaga o le pule i vaega o Tupe talu mai Iuni o le 1996, seia oo nei ina avea o ia ma Ofisa Sili e pei ona iai nei lona tofiga fou.
