O se alii leoleo satini o loo agai i ai se suesuega faalotoifale a le matagaluega o leoleo, ona o loo tuua‘ia i lona ave faananā o molimau a leoleo i le loia a se tasi sa molia i ni moliaga o le gaoi a o avea ma tagata faigaluega.
O le mataupu lea o loo molia ai ni tagata faigaluega o le Matagaluega o A‘oga Taaloga ma Aganuu, ae o se tasi o pule sili lagolago sa molia, ua faaleaoga ona moliaga.
O loo iai le talitonuga o le mafuaaga lea o le lē mafai ona finauina moliaga ona ua toesea nisi o mau o le mataupu ma ua liki foi molimau a leoleo i le itu sa faasaga i ai moliaga. Na fesiligia le sui komesina o leoleo le afioga Afamasaga Michel Soonalole pe faamaonia lea faaletonu.
O lana tali mai o loo faia se suesuega a le vaega o amioga taualoa a le matagaluega o leoleo e faatatau i le mataupu, peitai e lē mafai ona faamaonia ni tuua‘iga i le liki o molimau seia vaganā ua mae‘a le suesuega.
Na pau le itu na ia faailoa ua oo atu se tusi mai le ofisa o le Loia sili ua faailoa atu ai ni atugaluga i le lē mafai ona finauina moliaga o se tasi sa tuuaia i le solitulafono na gaoia ai meaaoga poo stationeries mai le ofisa o aoga i Malifa. O lē sa tuua‘ia ua toe foi nei e faaauau lana tautua ina ua faaleaogaina ona moliaga.
Peitai afai e moni tuua‘iga ua togafalea molimau a leoleo, e tauau ina faia ai ni moliaga faasaga i le alii leoleo satini o loo masalomia. O le faamatalaga mai le sui Komesina o leoleo, e faia ni moliaga faasolitulafono pe afai e maua ane i le suesuega faalotoifale o loo faatino e moni le mea na tupu.
O se tasi o alii faigaluega i le matagaluega o a‘oga na molia o loo tuli nei sona faasalaga faafalepuipui e lua tausaga ina ua ioe i moliaga e fesootai ma le gaoiga o meaa‘oga i le ofisa autu o aoga i Malifa.
O le isi toalua o ni tamaitai o loo faatali nei folasaga poo finauga faaiu a loia e fofogaina i le aso 11 o le masina fou o Mati, ina ua mae‘a ona suesueina molimau a leoleo.
O le saunoaga mai a le sui komesina, o soo se matupu e aafia ai ni tuua‘iga o alii ma tamaitai ofisa poo leoleo i ni taumafaiga faaalatua e noatia ai le faaalia o le mea moni, ua iai moliaga i lalo o tulafono faaleoleo ma tulafono tau i soligatulafono e mafai ona molia ai.
Peitai mo le taimi lenei e lē o mafai ona iai se tulaga faapea seia vaganā suesuega o loo faia e iloa ai pe moni ia atugaluga o le ofisa o le Loia sili a le Malo.
