E ui lava e talalafo atua, ae lua lava maota e afifio ai tamaitai, ua na o Mulinuu ma Sepolataemo, faapea foi ma Tuafaleloa; e afio ai le tama a le Taofia, faapea foi le malae o le taotolima a Galumalemana.
O maota foi ia sa auafa ai le tagauli (toga) a le toeaina (Tupolesava), sa tatala ai lona lagi i le aso 20 o Iulai, 2013, o le vaiaso na se‘i mavae atu nei.
O le mafuaaga tonu lea sa lē manofonofo ai i le tofa ma le faautautaga o le aiga ma le fanau o Pulepule Samani Pulepule, se aso ma se taimi faapitoa e ao ona faataunuuina ai lenei faamoemoe.
E ui lava ua faitau aso ma vaiaso talu ona taoto mai Pulepule Samani Pulepule i lona ti‘asa poo le loa o le oliolisaga tumau, ma sa faapea ona faatautaia ma limalima e le komiti faafoe ma le matagaluega lona peau faamavae, ae sa mau pea le toovae ma taoto le tofa i nisi o sui o le aiga, a mae‘a le aso o le toeaina i Aotearoa nei, e lē tatau ona faagaloina le tapuaiga a le nuu (Solosolo), o loo tui mai le mulipapaga i fanua; “…o le paia lava lea aua le afio o le Taofia a le Malietoa Taulapapa e ona le latou tama (Tupolesava) lea…alalata‘i Lemusu na falefa a‘i Leota, tainane le mamalu ia Saleutogipo‘e, o le Limamatua o faleupolu o tofiga, usoalii taua ma e na au i ao…” O le upu e masani ai si o tatou atunuu, e manatua pule ae lē manatua faalaeo…E manatua foi Afi‘a isi ona vao…
O le aso 20 Iulai, 2013, i le 7:00 i le taeao, sa faapea ona faataunuuina ai lenei faamoemoe i le afioaga lava o Solosolo ina ua atoa tupe i le taulafoga e tusa ma le tasi sa taoto i le tofa o nisi o sui o le aiga. Sa malaga mai ai nisi mai Niu Sila ma Ausetalia e fai ma sui auā le faamoemoe. Sa faatumulia le malae i le nuu, ma sa faamalieina itu uma, auā na muamua lava le faaaloalo i faifeau uma, sosoo ai ma le Taofia poo Faasisina, ma faasafua atu i le lautele o le nuu.
O se tasi itu mataina, sa maitauina le auai mai o malo mai le itumalo, e mai Tuisamau seia oo atu i le aai o Finoti… O i foi e lagona ai ma iloa lelei ai, e ese ma le mamalu o faamoemoe e faatautaia i o tatou laufanua, pe a auai le faamalumaluga o afioaga ma itumalo… Sa amata le faamoemoe i le malae, ae sa faaiuina i le fale ina ua to mai timuga. Sa taualuga fuafuaga uma i le mataina o le taimi na tatala ai le lagi o le toeaina i le tagauli (ie tele) sa auafa i Mulinuu ma Sepolaemo faapea Tuafaleloa, ma ‘au‘au ai i le palapalamalo.
E momoli atu ai le agaga faafetai isi tatou Afioaga o Solosolo faapea le falelua ia Saluafata, ae a le susu o Ie e lua, ona le tapuaiga mau ma le tu‘i mai o le mulipapaga, a o alofaiva le tama o Pulepule Samani Pulepule i ona tiute auā lona valaauina i le Finagalo o le Atua. Saunoa susuga Pas Sauafea Faatuatua Pulepule, o ia o le sui o le aiga, e momoli lona agaga faafetai i lo latou Aiga o Pulepule i le Komiti (SAOG) ma le matagaluega i le aso o Pulepule i Aotearoa nei.
Sa faapitoa foi sana faafetai i lo latou aiga, i paolo ma gafa aemaise foi le fanau, ma fanau o fanau o Pulepule ona o lo latou lagolagoina faatasi o le lagi o si o latou tamā pele i totonu o lona Afioaga.
