Faaauau le faamasinoga o le alii faipisinisi Vailele

O loo faaauau mai i le vaiaso lenei le iloiloga o se faamasinoga, ua tuua‘ia ai se alii faipisinisi mai i le afioaga o Avele, Tofele Lata Tavu‘i i le taumafai e faaoo le oti i se alii sa nofo i lona fale, o Lupematasila Tofilau Faamanu Ivara i le amataga o le tausaga.
O lea faamasinoga na amata mai lona iloiloga i le vaiaso na tea nei ona o loo tetee Tofele Lata Tavu‘i i le tuua‘iga o le taumafai e faaoo le oti.
O le molimau a le alii na aafia i lenei mataupu, Lupematasila Tofilau, sa feiloai ia Tofele Tavu‘i a o taofia o ia (Lupematasila Tofilau) i le toese ona o se isi mataupu a lona afioaga i Falelatai.
Sa talanoaina ai loa le mafai ona nofo Lupematasila Tofilau i le maota o le alii faipisinisi i Vailele. Na faamatala le alii o Lupematasila Tofilau, o le tuutuuga o lona nofo ai i le fale o le alii faipisinisi, e togitogi ai le tupe ina ia mae‘a ane ua ia ave le fale ma o le po lea na osofai ai o ia e Tofele Lata Tavu‘i na talanoaina ai le oo atu i le $120,000 ua mae‘a ona totogi e Lupematasila Tofilau ia Tofele Tavu‘i.
E masalosalo le alii na lavea, atonu o le mafuaaga lea ua osofai ai o ia e lana paaga faipisinisi ona o lea ua lata ina mae‘a le totogiina atoa o le fale lea sa nofo ai, ma ua latalata ina aloaia le pulea poo le umia loa e Lupematasila Tofilau o le fale lea e i Vailele.
E ui o lea na ia ta‘ua i le faamasinoga e lē o malamalama lava pe aisea ua faia ai e lē ua molia lea gaioiga faasaga ia te ia, e lei manino lava foi lea tulaga.
Faaalia e se alii e suafa ia Asotau, o ia lea sa nofo ma galue e fai feau ma teu le fanua i Vailele, o le po lea na tulai mai ai le faalavelave, na mae‘a le taumafataga a lē ua molia ma lona toalua ma Lupematasila Tofilau, ae alu atu Tofele ia te ia ma faapea atu e alu i le maota o se tasi o matai o le afioaga e aumai ai se laau malosi.
Sa musu Asotau ma iu ai lava ina alu Tofele i le fale o le matai e pei ona ta‘ua. Ta‘ua e Asotau le foi atu o Tofele ma ta‘u atu ia te ia o le a alu e “fana Lupematasila” ae na ia fautua i ai e mafaufau i lona aiga. Na ta‘ua e Asotau na leai se tali ae savali loa Tofele i le fale.
Sa ia faalogoina le pa o le fana ma na ia vaaia mulimuli ane le sau i fafo o Lupematasila Tofilau ua lavea le itu taumatau o lona fatafata ae sa ia vaaia i le taimi lea le fealuai solo lava o Tofele i totonu o le fale o loo ia uuina le laau malosi.
Na faatatope Lupematasila Tofilau i le falemai ma togafitia ai i ona manu‘a. O loo faaauau le tetee o Tofele Tavu‘i i le moliaga o le taumafai e faaoo le oti ma o le vaiaso lenei ua faaauau ai lea iloiloga.