Toatele e sulufai i le Toomaga saili fofo o mafatiaga

O faamaumauga mai le faalapotopotoga o le Toomaga mo ē Puapuagatia, le Samoa Victim Support Group, ua iloa ai le avea o le auaunaga o loo ofo e lea faalapotopotoga tuma‘oti ma faitotoa e ulufale i ai soo se tagata i le atunu mo le fia maua o se fesoasoani.
E lē gata o tagata lautele ae ua faaaogā foi e tagata faigaluega i le Malo ma kamupani e sulufai i ai mo ni tali o o latou faafitauli e lē gata i le va ma mātua ma isi tagata, ae o le va ma i latou o loo taiulu i galuega.
E faapena le aufaigaluega a le tineimu i se mataupu lata mai nei lea na fiu nisi o alii ma tamaitai faigaluega e ave tusi faaseā i le pulega ona o faaletonu ma solitulafono sa faia ia i latou, ae e lei maua ai se tali.
O nisi o tamaitai o lea ofisa o le malo na la tuua‘ia le alii pule i le faatinoina ia i laua o ni faiga lē manuia. O le isi na faia i ai se faaoolima matagā, a o le isi na faamalosi.
Ua faaalia e le Peresetene o le Toomaga le faletua o Lin Chang, o le siliga o se tali atu o le pulega o le tineimu aemaise o lē sa avea ma pule poo le Komesina i mataupu sa laga e nisi o le aufaigaluega, na liliu ai loa ma agai atu i le ofisa o le Toomaga.
E lei nofoai loa le Peresetene ma ave lana tusi i le taitaifono o le komiti faafoe o le tineimu le afioga Letaa Daniel Devoe, ma faailoa i ai atugaluga ma faafitauli o le aufaigaluega. Na tatali se faamatalaga a le taitaifono ae sa lē faamalieina ai le Toomaga ma faapea ona tusi atu ai i le taitai o le Malo i le Palemia ma faailoa loa i ai le faaletonu.
O le logo lea na vave ai loa ona ave e le Palemia le mataupu i le ofisa o le Komesina o sulufaiga ma faia le suesuega lea na faamalieina ai le Komesina o sulufaiga i mau na tuuina atu e nisi o tagata faigaluega, ma faapea ona ave loa i le Kapeneta ma faia ai le iuga e faamuta le toe avea o Seve Tony Hill ma Komesina o le tineimu.
“O le fesili lea ua tulai mai i nai tagata, poo ai o le a sulu i ai pe ana leai le matou galuega”, o le finagalo lea o Lina Chang le peresetene o le Toomaga.
Ua avea le aafia o le faalapotopotoga i mataupu eseese faapenei ma tulaga ua itagia ai le faalapotopotoga e nisi tagata, aemaise lava i latou e aafia i ni tuua‘iga.
Faaalia e le peresetene e poo ā lava tala tau faaleaga ma upu taufaifai a nisi i le latou tautua, ae lē mafai ona solomuli i le faia o le latou galuega o le tali atu i mafatiaga o tagata lautele.