O le kalapu lakapi o le Irish Rugby Club i Peretania sa taalo konekarate ai le alii o Peter Poulos, o se tamafanau a Samoa a o lei faia lana filifiliga e suia mai e taalo mo le ‘au lakapi a le atunuu le Manu Samoa, lea sa filifilia ai i le ‘au mo le Ipu o le Lalolagi na faia i le tausaga e 2003.
O aiaiga o lana konekarate i lea kalapu lakapi sa maua ai lona totogi e $80 afe pauni tupe Peretania i le tausaga, faatasi ai ma lona inisiua pe a aafia i ni manu‘aga mai se taaloga. Ina ua liliu mai e taalo mo Samoa sa iai lona talitonuga o faamanuiaga foi ia na te maua e ui o loo iai lona talitonuga atoatoa e matuā eseese lava tupe maua a kalapu lakapi sa taalo ai ma tupe e maua e le lakapi i Samoa.
Peitai sa ia faamatala i le faamasinoga a o faia lana molimau, sa faateia ina ua aafia i se manu‘a i se taaloga faasamasamanoa ma le ‘au a Siumu, ae ona iloa mulimuli ane e lē maua se inisiua mo lona manu‘a i lona ua. E $1miliona tala o loo tagi ai lea alii lakapi e totogi atu e le Iuni Lakapi Aoao a Samoa, ona o lo latou faatamala ma le faatalalē ua lē mafai ai ona ia maua faamanuiaga i lona inisiua ina ua manu‘a.
O le tausaga e 2006 na amata ai le taamilosaga lakapi o le Ipu a le Pasefika le Pacific Rugby Cup poo le PRC. E lua ‘au a Samoa sa filifilia mo lea taamilosaga o le Upolu Samoa ma le Savaii Samoa.
O Peter sa filifilia na te kapeteniina le Upolu Samoa. O le aso muamua o Aperila 2006 na faalauiloa ai ‘au e lua ma agai ai loa le Upolu Samoa i le latou tolauapi sa faia i le nofoaga o le Tofamamao i Leauvaa.
Na iai le fuafuaga e faia se taaloga faasamasamanoa poo se friendly game a le Upolu Samoa ma le ‘au a Siumu sa faia i Siumu. O le taaloga lea na faamatala ai le alii o Peter ma aafia ai loa i se manu‘a ina ua salalau le sikalamu.
O ia sa numera 8 ma o lana faamatalaga i le faamasinoga, na agai i tua o le malae ma ia faalogoina lona mafatia tele. Peitai e leai se fomai sa iai ma ia taumafai ai lava e togafiti lona manu‘a i lona ua i le tuu i ai o taga pepaaisa.
O le aso na sosoo ai na ia faalogoina lava ua tigaina, ma agai ai loa e vaai le alii fomai o Dr Tala Taavao. O le fomai lea na fautuaina o ia e sili ona vave alu i Niu Sila e saili ai se isi togafitiga.
O nei feuiuiaiga uma na faaalia e Peter e leai se seleni na maua atu i le Iuni lakapi, peitai sa faamautu atu e le faiaoga o le Upolu Samoa i lea taimi, le susuga Selefuti Patu ma le taitai malaga le tofa Fasimalo John Muaitau, e maua lona inisiua.
O le lua vaiaso talu ona taunuu i Niu Sila ma ia vaaia ai ni fomai faapitoa sa faailoa ane ai o ia e fai si ogaoga o lona manu‘a i lona ua ma e ono aafia ai ma lona maeaalio poo le spinal cord.
Sa ia fesootai mai pea i le alii o Peter Horn e faapea o ia lea sa faatupeina uma ona siaki faafomai i Samoa faapea ma Niu Sila, peitai na logoina atu o ia e lea alii, ua faailoa atu e le Iuni lakapi e leai se inisiua mo ona manu‘aga.
Sa tutulu le alii o Peter Poulos i se vaega o lana molimau na oo ai lana faamatalaga i le lagonaina pea o le tiga mai ia manu‘aga. Na avea ma mafuaaga o le faia o le malologa a le faamasinoga ina ua amata ona valaau molimau i le Aso Lua, aso 14 o Iuni 2011. O loo tetee malosi le Iuni lakapi i le tagi a lea alii lakapi.
O le mau a le loia o Semi Leung Wai o loo tulai mo le Iuni lakapi faatina, o loo iai tuutuuga e faato‘ā inisiua lava se tama lakapi pe a oo ina saini le konekarate, ma o loo ioeina e Peter lona aafia i manu‘aga ae lei sainia lana konekarate i le au o le Upolu Samoa.
O loo faatalia nei se faaiuga a le Faamasinoga Maualuga i lenei mataupu tau faamasinoga. O Peter Poulos o ona mātua o loo faagaioia le faleaiga lauiloa i Samoa o le Skippy lea o loo i le Maota o le Alofa i Apia.
