E lē taumate e afua ona māmā se avega mamafa ma faigofie ona faatino se faamoemoe, ona o le pulupululima faatasi.
O le galulue filigā ma le tautua atunuu o nisi o alo ma fanau faapea auaiga o le tina matua ia Vaitupu Timoteo, na tasi ai lava loto ma finagalo i se fiafia tuufaatasi e famanatu ai foi galuegafai o le ogatotonu o lenei tausaga.
O le vaega lea ua lauiloa i Brisbane i le ENCHIRO (Galumalemana Naea Harry Timoteo, faletua ia Apu) faapea Diane ma Mika Nansen o alo foi ma fanau a le aiga atoa sa tele ina faatamoeina le faamoemoe. Na aami mamao mai le susuga ia Soo Falemoe e faatatagi lona siufofoga mālū i lea po, a o faapea ona faafufusi le uosi e faamautu ai le fealofaniga i ulugalii a o lotolotoi ai luga o le floor, ma o le isi lea vaega na faatumulia ai lea afiafi.
Na sioa le aumaimoa i faafiafiaga a tamaitai o le po, poo faafafine sa toe faafiafia, a o lei tuuvaa atu i le malo tele e tali so latou valaaulia; Se ua lē ‘ole lea pei lava o ni teine moni moni lava. Na tatagi faasoloatoa ai foi siufofoga mālū o le faaili lauiloa i Brisbane ua igoa o le “One Sound” a le susuga ia Eric Pepe ma le vaega.
Na malupuipuia lava ma leai se isi na faafiufiu auā na faafitafita ai sikulaki sa fai ma toomaga a o alo le aufaafiafia i tafaoga ma le au eva i le musika. E ui i se uigaese o le tumu o lea po, peitai e lē o le auga lea o faigamea ae na sili ona faafetaia le Atua ina ua iu manuia, leai ma se peau na lagavale i le lagolagoina e paaga a le Enchiro o le latou faatalauula e opogi lo latou po fiafia. Taape uma le aofia ma le fiafia ona i lea afiafi a o faavasega se vaega tupe tele na tauaaoina e le ENCHIRO i lea po.
E avea ai le auaunaga masani a le Samoa Times e faaleo ai se faafetai faalēlava a le aiga i le paia ma le mamalu o le atunuu o afea lenei auaunaga. Faamanuia tele le Atua. Alofaaga auina atu ia Galumalemana Naea Harry Timoteo & Apu ma le nofoaalo faapea Diane ma Mika Nansen ma le aiga atoa.
