“Ua na o le Atua e malie ai le galala o le tagata, ia faamanuina le suafa o le Atua ma aua foi ne‘i galo se tasi o Ana meaalofa”.
O nisi o upu o lauga faalaeiau i le toe sauniga o le taulaga paia o le misasa i le tuua ai o le malo e le fetalaiga Lavea Pa‘u Piana Puni ina ua valaauina e lona matai i le aso 4 Iuni 2011.
O lona toe sauniga sa faataunuuina i lana ekalesia Katoliko Sacred Heart Church Addington i le afiafi o le Aso Faraile 10 Iuni. Na taitaia e le Afioga Patele Father Fitzmaurice, ae lagolagosua le Afioga Patele Paulo Filoialii.
Na faatumulia lea afiafi faaleagaga i tauaiga, mamalu o le atunuu aemaise le Fono a Matai Samoa o Kalaiesetete.
Na faasolo molimau a le aiga sa tauaaoina e To‘alii Puni, lona tuafafine o Faatasiga Puni, faapea alo ma fanau ua tuua aemaise le molimau a le Fono a Matai Samoa na fofogaina e Faletolu Tiatia, ona o Puni sa faatamā i ai le Fono a Matai i Kalaiesetete.
Na soifua mai le tamā matua o Lavea Puni i lona afioaga i Samatau i le aso 20 Iuni 1930. Sa faataotolia i lona gasegase i le falemai i Kalaiesetete ma maliu filemu ai ae toeitiiti lava aulia lona 81 tausaga.
O ia o le alii o aiga e ulumatua i ai le fanau e toasefulu. E to‘a 12 le fanau, 42 fanau a fanau ma great grandchildren e 29, ma o se aiga e faamanuiaina i le toatele, e pei ona faaalia i le tele o molimau le tausi aiga, faafiafia loto ae ‘ote foi, tausi ekalesia aemaise lana faatoeaina i le tuu ma le moe.
O viiga o le sauniga sa usuina e le Puni Choir, tasi lea taleni musika ua tuu i le fanau e pei ona molimauina e le aofia le matagofie o viiga o le Atua sa tapenaina i lea po. Na tuumuli atu le aofia i le hall mo se inugati, ma alo atu ai le mamalu o le aiga faanoanoa i faaaloaloga maualuluga auā le paia lasilasi o le atunuu na auai, sa faatautaia lea e le fetalaiga Lavea Aseta.
Peitai o le Aso Gafua, 13 o Iuni, na molimoli atu ai lona tino maliu i Samoa i lona afioaga i Samatau e lagomau ai, e pei o lona toe manao i alo ma fanau ua tuua.
Ia faamaise le agaga faamafanafana o le Atua i le aiga faanoanoa aemaise le fanau pele.
