E mai le 200 ekalesia Kerisiano ua mafai ona fusia faatasi mo le tuufaatasia o se sauniga tele faaevagelia ua faaigoaina faapea, Auckalnd Harvest.
E tusa ai ma se pepa o faamatalaga na tuuina sa‘o mai i le Samoa Times, o loo ta‘ua ai e faapea, o le isi sauniga faaevagelia aupito i telē lea, e faatusatusa i se tasi o sauniga o loo faamauina i talafaasolopito o Niu Sila, talu mai le tausaga e 1959 ma le 1969, lea na asiasi mai ai le auauna tautaua o Billy Graham.
O Billy Graham na malaga mai i tausaga e pei ona ta‘ua, ma o ia o se auauna iloga i lona foi vaitaimi na tulai mai ai ma faameaalofaina e le Atua i le folafolaina o le Upu, aemaise o isi meaalofa sa faaaogāina ai lona soifua.
O ia o se auauna mai Amerika. Ae o le aso 25 ma le 26 o le masina nei o Iuni, o le a faataunuu ai se tasi foi o auauna tautaua mai le itu i Saute o Kalefonia i Amerika lava.
O le susuga ia Greg Laurie o se alii Faifeau, a o se Faievagelia foi, o le a taunuu ma faatautaia le sauniga tele o le a faia lea i le fale aupito tele i Aukilani, le Vector Arena i totonu o lona taulaga.
O se sauniga ua nofo sauni ma tulimataia e le toatele o tagata Kerisiano o Niu Sila.
O se vaega o lea sauniga o le a silasila ai foi ma faafofoga i nisi o tagata pepese lauiloa, ma musika mataina i viiga o le Atua, o le a fesoasoani tele i le feau momoli ma le galuega a le Faifeau faapitoa o Greg Laurie.
O ai e nafa ma musika, ma viiga o le Atua?
O tagata lauiloa i musika ma pese ma aufaipese e pei o Jeremy Camp, Kutless, Phil Joel, Parachute Band, Martin Smith, faatasi ai ma alo tautaua o Samoa, Le Katinas.
Jeremy Camp: Sa faamauina o se tagata Kerisiano lona tolu i le lalolagi i ē ua uma ona faamauina e le Billboard Magazine. Ua silia ma le 10 tausaga talu ona auauna ma tosina i ai le toatele o le aufaalogologo i ana musika ma pese.
E silia ma le tolu miliona tuufaatasiga o pese sa faasalalauina ma fatuina, ma o lana tuufaatasiga mulimuli talu ai nei sa faaigoaina We Cry Out, ma sa taulai o ni pese e faaviivii ma faaneeneega o le Matai. Sa faamatuuina i le tausaga 2010 ma sa pikiina e le toatele e lona lua i ai viiga o le tausaga.
O tusi ma pese na tusia e Jeremy sa matuā fiafia tele i ai le anoano o Kerisiano o le lalolagi.
Phil Joel: O se tagatānuu o Aukilani i Niu Sila, ma o ia o se sui muamua o le Newsboys. O ia ma lona toalua, Heather sa uluai mauaina le Deliberate People, o se taumafaiga sa fesoasoani ai mo tagata ina ia suia a latou fuafuaga e avea ma viiga o le Alii.
Parachute Band: O se faaili tautaua e nonofo foi i Aukilani. O se tasi o faaili o le sefulu aupito i luga i le faatulagaina o musika ma pese faaleagaga.
O le tuufaatasiga sa faaigoaina Love Without Measure, o le latou uluai pesega foi lea sa tuufaatasia lava e latou, ma sa faato‘ā faamatuuina i tua mo tagata lautele i le tausaga na tea nei 2011.
Martin Smith: O se tasi o tagata iloga ma e masani ona faaaogāina o se tasi e pito i luma i le Delirious, ma sa faaaogāina foi i malaga taamilo a le faaili lauiloa a le Parachute, i le tiute o le taitaiina o viiga ma faaneeneega o le Atua i sauniga tuufaatasi.
The Katinas: O le auuso e toalima, Sam, James, Jesse, John ma Joe e mai Samoa, ma o i latou lava o ni tamafanau a le atunuu. E masani ma ua soo ai le lalolagi i taamilosaga ma koneseti o pese faaleagaga. Ua silia ma le 20 tausaga o tautua pea i le tusia ma le tuufaatasia o viiga o le Atua, atoa ai ma le usuina o pese.
E tautaua tele i le lalolagi, ma o loo sauni nei e faamatuuina se tasi o tuufaatasiga ua mae‘a ona tapenaina ma ua faamoemoe i le faaiuga o le tausaga nei e faalauiloa ai.
O le sauniga faaevagelia i po e lua e pei ona fuafuaina o loo tatala foi le avanoa mo tagata lautele ma soo se tasi lava e fia auai.
O le masina o Aukuso o le tausaga na tea nei 2010, o le taimi mulimuli lea na iai Greg Laurie i Niu Sila, ma na saunoa ai i nisi o sauniga tuufaatasi se lua sa faia i le ASB Theatre ma le Aotea Centre i le taulaga lava i Aukilani, ma sa auai ma molimauina e le toatele e tusa ma le 2,750.
O le sauniga e pei ona loma nei, ua atoa le tausaga o faia ni feiloaiga a le aufaigaluega mai ekalesia eseese mai Hamilitone e oo atu i Whangarei, mo le faamaopoopoina ma le tapenaina o le faamoemoe.
O le agaga ma le talitonuga e tasi tuufaatasi sa faavae ai fefaasoaiga auā lava le agai i luma o le talalelei a le Alii. Sa faigofie tele ai ona maua le tasi ma le agaga tutufaatasi, e lē gata i auauna a le Atua, ae faapea foi le tino o Keriso i ekalesia Kerisiano.
O tapenaga lava latou ia mo po e lua e pei ona fuafuaina, ua faailoa ai e faapea e tusa ma le 250,000 valaaulia faatasi ai ma pepa o faamatalaga e 10,000 ua mae‘a ona tufatufaina, ae tusa ma le 2000 tagata ua ofoina ane o latou taimi e galulue i galuega masani o ituaiga sauniga tetele faapea.
Na faamaonia e se tasi o Faifeau sinia o le ekalesia Perepereane i Botany Down, Pastor Andrew Norton (St Columbia Presbyterian) o le latou aulotu le isi ekalesia na muai faalogologo ma molimauina saunoaga a Gerg Laurie i le taimi muamua na iai i Niu Sila i le tausaga na tea nei.
Na molimauina e le toatele le faauuina ma le loloto o a‘oa‘oga, ma ua suia ai olaga o le toatele, ma o le mafuaaga lea o le fetuleni ma le naunau o le toatele e ofoina o latou taimi, ma ua faafaigofie ai soo se feau ma soo se galuega faatino mo le tapenaina o le sauniga ua sauni atu i ai i le masina nei.
O le tautinoga a le alii Faifeau ia Andrew ma le toatele o le auuso Kerisiano, o le sauniga o le masina nei, o le a sili atu ma uigaese nisi o taumafa faaleagaga ma vavega a le Atua o le a tutupu ai.
Talaaga ma le amataina o le soifua auauna o Greg Laurie
O le tausaga e 1990 na amata mai ai sauniga o le Seleselega a Greg Laurie ma lana feau momoli, ma ua oo atu i le 4.2 miliona i latou i nofoaga tetele i le lalolagi atoa e auai ma faamanuiaina i le feau a le Atua e tauala i lenei auauna.
O le toatele o tagata e fiafia e gauai i sauniga sa faia i le tele o atunuu o le lalolagi, e fiafia i musika ma viiga o le Atua, ae sili ai le fia faafofoga tele i le mataupu ma le feau mai le Atua e ala i lana auauna.
O Greg Laurie sa muai valoia e Billy Graham i lona vaitaimi e faapea, O le a tulai mai o se auauna Faievagelia mo le lumanai.
O nisi o malosiaga o le Faifeau, o ia o se tagata e fiafia i soo se tasi, e talanoa sa‘o foi i mataupu ma mea o loo tutupu e atagia ai le finagalo moni o le Atua, ma e fiafia tele foi e tali i soo se fesili e tuuina i ai, i soo se mataupu lava e fia maua i ai se fesoasoani.
Na amata lona soifua i le tulaga faafaifeau ma le galuega tala‘i ina ua faato‘ā 19 tausaga o lona soifua, a o ia taitaia se aoga ma suesuega i le Tusi Paia i se faalapotopotoga laitiiti e na o le 30 tagata sa auai.
Na suia e le Atua lea 30 tagata sa amata ai, i le 15,000 o tagata o le ekalesia ua iai nei i lalo lava o le taitaiga a le Faifeau o Greg Laurie.
O loo faitauina o se tasi o aulotu aupito toatele mai le tele o ekalesia tetele i totonu o Amerika.
