Ua faamanuiaina se sui o le Kalapu o le lakapi a Vaimoso i se konekarate e taalo ai i Iapani mo tausaga e lua. O se avanoa o loo saili uma e tama taaalo o le lakapi ae o lea ua maua e lenei alii talavou ae o se tagatānuu o Tonga o loo nofo ma galue i Samoa nei.
O le alii e suafa ia Aukilani Hudson, sa taalo mo Tonga i au i lalo o le 16 tausaga le matutua ma le au e i lalo o le 21 tausaga le matutua. O se alii ana nofo i Tonga e mautinoa lava ua avea ma se tasi o le Ikale Tahi i lenei taimi, peitai o le tele o tausaga o le agai i le matua o lenei alii na malaga mai ai i Samoa ma nofo ai.
E faaipoipo lenei alii i se tamaitai Samoa. O le taunuu mai o Hudson i Samoa na taumafai ai loa mo sona avanoa e taalo ai mo se aufili o le lakapi a Samoa nei.
Ta‘ua e lenei alii o ia e fiafia lava ma e malosi foi lana taalo i le taitoafitu ma ua tele tausaga o taumafai lava e maua se avanoa i le au a le taitoafitu a Samoa peitai o le lē avea ai o ia ma tagatānuu o Samoa ua faigata ai lava ona maua se avanoa faapea.
O lea foi lava na talanoa lenei alii i le Taitaifono o le Iuni Lakapi a Samoa le alii Palemia foi lea mo se avanoa ma na fautua i ai le alii Palemia e onosai lava ma faaauau ana taaloga i Samoa ona o le itu lea e lē o se tagatānuu o Samoa ma seiloga ua avea o ia ma tagatānuu Samoa ona faafaigofie loa lea o lenei avanoa.
O lea ua maua le isi avanoa e faalautele ai le lakapi a lenei alii ma ua faapea ona sauni atu nei e taalo i Iapani mo tausaga e lua.
O lea avanoa na ia ta‘ua atonu o le a saga unai ai lona tomai i le taaloga o le lakapi ma toe foi mai loa taalo mo Samoa.
