O le A‘oa‘oina o le Gagana ma le Aganuu o se tasi lenei o manulauti faataoto a le Leo o Tagata Samoa i Logan City Brisbane Ausetalia.
Ma o vaega tetele nei o nisi o ana fuafuaga faataoto vaai mamao (strategic planning) ma ua gafa e tasi le Laulau a Fono poo le Komiti Faatonu e avea o se tasi o faatinoga (activity) tauave i Tausaga uma.
O le Aso Toonai, 7 Fepuari 2015 sa faataunuuina ai le tatalaina aloaia o lenei foi matalalaga o le aoaoina o le anoafale o la ta Gagana ma le Aganuu o lo tatou Tofi lea mai le Atua. Ma le faamoemoe o le a faataunuuina i masina uma seia oo atu foi i le taulaumea o lenei tausaga.
Ua matauina le toatele ma le autovaa mai o le mamalu o si o tatou atunuu, ona o le tele foi o le anoa ma le faamoemoe o lenei aoaoga poo le polokalame faapitoa o loo fitaituga i ai le Leo o Tagata Samo i Logan i lalo o le faatautaiga e le faiaoga o le gagana ma le aganuu Samoa, Le‘autuli‘ilagi Malaeoalii S Vaatausili Tuala Tamalelagi Leapai ma o le Sooupu foi lea ma le Teuoloa a le Mafutaga a le Leo o Tagata Samoa i Logan.
Sa mafai ona molimauina le fiafia o le toatale aemaise o i latou o ē sa mafai ona auai mai, ma faailoa lo latou fiafia tele ma le nanau e fia auai mai pea i lenei polokalame.
Na amataina le faamoemoe i le Aso Sa 8 Fepuari i le sauniga lotu e pei ona masani ai lo tatou atunuu i ana tu ma aga, e muai siitia lava le viiga o le Atua ona alo ai lea i isi fuafuaga e masani ai si o tatou atunuu.
Na mae‘a loa le sauniga lotu ona agai lea i le agatonu ma le ‘ava faatupu e patipatia ai le alofa o le Atua ua aulia mai lenei tausaga fou i ona tiute fai, aemaise o le polokalame. Na mae‘a loa le avafaatupu ona alo loa lea o le faiaoga i le tatalaina o le faautaga ma lana utulalaga auā le agai atu o le atunuu i lana asugavai ma le nanau e fia maua pea le sosia ma le tāua o la ta gagana ma le aganuu.
O le polokalame na amata mai i le itula e 12pm seia oo atu i le itula e 3.00pm. Na faaiuina le faamoemoe i le taumafataga na saunia auā le agai atu o le mamalu o le atunuu, o matai o alo ma fanau, ae lē gata i lea o le itupa o tamaitai o ē ua faasuafaina i Suafa o aiga.
Na mafai foi ona auai ma molimauina le maualuga ma le aogā tele o lenei polokalame. Mo le silafia o lenei polokalame e taia soo se tasi mai le 18 agai i luga i soo se matua. Ma o lenei polokalame e leai se totogi, ae na o se meaalofa e faia i le lotomalie (donation) e fesoasoani ai i nisi vaega o le faatautaiga o lenei polokalame.
O le Leo o Tagata Samoa Inc i Logan o loo Peresetene ai le Tofa Faimalotoa John Pale, Sui Peresetene le Afioga Masoe Tagaloa Falemoa Pepe, ae Failautusi ai le Tofa Su‘a Aiiloilo Akeripa Uelese.
Mo le silafia o le Polokalame lenei sa faia le latou faauuga i le tausaga ua mavae ma maua ai Tusipasi o le toatele foi o le mamalu o si o tatou atunuu o ē sa auai ai i lea tausaga.
