A o faagasolo pea faataitaiga ma le maimoaina o le ata tifaga o le Lion King a o lei tuuina i le atunuu lautele, e toatele i latou o loo agai atu ma maimoaina le matagofie o lona faatinoina aemaise le mataina o alo o Samoa lea o loo faatinoina le vaega a Simba matua, o Nick Afoa mai Aukilani i Niu Sila, faapea le alii tausaafia o loo ia faatinoina le vaega a Simba laitiiti, o Exodus Lale o ia e alala i Brisbane ma ona mātua.
O Exodus o se tasi o alo e faasino ia Faalafitele Papalii Tino ma Nicola Lale. Na amata mai ona faataitai o ia mai le valu o ona tausaga ia Iuni 2014. O se tasi foi lea o tamaitiiti na agiagia le manaia o lona siufofoga a o ia soloina se tasi o viiga o le Atua i le tauvaga pese a le leitio i le 2013 mai le Ekalesia Samoan Uniting Church a Sunnybank.
Sa faapitoa le valaau i le avanoa lea ua maua e Exodus mo le 10-12 tausaga ae na talia le tusi talosaga a lenei alo laitiiti o le atunuu na tuuina atu i le Disney ma na lagolago malosi e ona aiga e ala i talosaga faapea le auai e maimoaina lona taumafai.
O se faasiliga malosi foi lea ma lona naunau e faatino lana vaega e ui e lei iai sona tomai tau musika i ata tifaga.
O le alii o Exodus e i totonu o le aufaipese a le ekalesia a Sunnybank Uniting Church, sa ola a‘e ma aoaoina tu ma aga faaaloalo a Samoa ina ia iloa ona faaaloalo i luma o tagata.
Ina ua mauaina le tala ua faamanuiaina lana apalai, sa faatonuina e agai atu i Sini mo faataitaiga o lea na faamavae ai loa ma lana taaloga lakapi ae o atu ma ona mātua ma si ona uso o Ephesians Lale ia Aukuso 2014. O le a faamae‘aina le pueina o le ata tifaga ia Ianuari 2015.
O tuaa o le tamā o Exodus (parental grandparents) o Sa‘u Lemana Faalafi Lale mai le alalafaga o Safune i Savaii & Apolima Uta, faapea le faletua ia Fofoga Sa‘u Lale mai Vaiusu. O tuaa o le tina o Exodus (maternal grandparents) o Sauoaiga Maulupe Tupu & Ruta Lam Sam Tupu mai Satupaitea, Savaii & Sinamoga.
