Ua suia le itu o le auala e feoai ai taavale i Samoa. Ua sui le itu ua iai i Samoa i le laina tuaoi ma ua sui ai ma aso. O suiga tetele ia ua tatou molimauina a o tulai pea le HRPP i le pulea o le Malo ma le atunuu.
E iai ma isi suiga e pei o le teuteuga o le faavae o le a saofia ai tofi faipule e lima o le itupa o tamaitai lea o le a mautinoa ai lava le iai o ni tamaitai i upufai i soo se paeaiga a le Palemene e amata atu i le paeaiga o le 2016 pe a mae‘a le palota tele o lena tausaga.
E mafai foi ona tatou faapea o isi suiga ua iai nei talu ona tu le HRPP i le pulea o le Malo ma le atunuu, o le faiga o pisinisi, o auala o faasalalauga ua mafai ai ona tatala le avanoa ua faatu ai soo se leitio poo se fale televise, aua o tausaga ua mavae sa nao le tasi le leitio ua nao le 2AP.
O le faamanatuina o le 35 tausaga o le HRPP na saunoa ai le taitai le afioga i le Palemia ma ia toe folasia nisi o suiga tetele na faatino e le Malo e ui sa lagona ai le leo o le tetee ona o le lē taliaina e nisi o ia suiga. Atonu e manatua e le au faitau nusipepa le suiga o le itu auala na faia ai solo tetee lea sa ave ai foi le suiga lea i le tulafono.
O le ausia e Samoa o nisi o suiga tetele o se matati‘a lea ua ausia e le HRPP. O le saunoaga a le taitai na ia folasia ai foi ma le tulai mai o lana vaega faaupufai ma siitia le tulaga o tamaitai i le atunuu e pei ona toatele nisi o tina ma tamaitai ua filifilia e faauluulu i ai galuega a le Malo.
Saunoa Tuilaepa i le fono a lana vaega faaupufai e tele ma anoanoai luitau o loo feagai pea mai lea taimi i lea taimi ae o loo mauaa pea le lagolago a le atunuu e ala i faigapalota ua mae‘a. O le palota tele o le 2016 e leai foi se isi tulaga o loo tulimatai e le HRPP e pei ona faaalia e se tasi o sui lagolago, o le manumalo lava.
Na molimauina e le tusitala le toa gaogao o sui lagolago ma le atunuu na auai i le faamantuina o le aso fanau o le vaega faaupufai, ae na faaalia e se tasi o sui lagolago e iai nisi o loo feagai ma tuatuagia lē maalofia, a o nisi foi o faipule e lei auai o loo malaga mo tiute faalemalo. Peitai na musumusu mai se isi o faipule o le HRPP ma ia faailoa lona maofa i le toaitiiti o i latou na auai.
“Atonu o lea ua foliga mai ua faaitiitia le tulaga lauiloa (popularity) o le HRPP”. O le vaiaso foi ua mavae i le Aso Faraile 19 o Tesema na faamanatu ai le lima tausaga o le vaega faaupufai o le Tautua Samoa, ma o foliga foi ia na vaaia o le to‘a gaogao o sui lagolago ma tagata na auai.
Peitai na saunoa le taitai o le sauniga le susuga i le Tiakono o Kasiano Leaupepe o se sui lagolago foi o le Tautua Samoa, e lē tāua le numera o tagata e auai, ae tāua galuega ua faia e le Tautua Samoa i le va nonofo ai ma le faigamalo a le HRPP talu ona tulai mai e avea ma Itu agai, ona ua tele mea lelei ua na finauina ai le Malo i le lē amitonu o faaiuga fai.
O le mau foi lea a le Palemia e faaalia pea i nisi o faatasiga na te faafetaia ai le galuega a le Itu agai, o loo mafai ai ona sagatonu ma silafia e le Malo ni faaletonu ma vave faia i ai ni togafiti e foia ma fofo ai ni faaletonu e tutupu ma aliali mai.
