Mata‘u i le Atua o le Amataga lea o le Poto

O le sini autū lea o le tauiviga, auā ua aeae nei i faleseu ae mapu ane i maaomalie lagona o le faagaeetia auā o le faamoemoe lele sa fau ao fau po ua taunuu nei, o le laau lea o le ola ma o le viiga lē faaitiitia foi lea o le Atua.
O se matatia muamua foi la lenei ua tino mai i le talafaasolopito o tauiviga faaleaoaoga mo alo ma fanau o si o tatou Atunuu, i totonu o Aotearoa nei, i le tulaga lea ua faavaeina ai nei le mafutaga a le aulotu EFKS a Magele i Sisifo ma le Iunivesite a Otago.
O se feagaiga lea ua faatupeina ai e le Iunivesite lenei polokalame tāua, o le iai lea o se nofoaga e faalauteleina ai ma maua ai fesoasoani mo le lagolagoina tele o fanau i le faataunuuina o le faiga o a latou meaaoga, aemaise tapenapenaga mo le mafai ai ona ulufale atu i totonu o Aoga Maualuluga (Colleges) aemaise lava le ulufale atu i totonu o Iunivesite.
E tele ni vaega na saunoa i ai le susuga David Richardson (Director of Student Services) mai Otago University na fai ma liutau i lagona ma mafaufau o le fanau, auā sa matuā faamanino lelei lava le tele o vaega e tatau ona silafia ma tapenapena lelei i ai le tamaititi mo le ulufale atu i aoga nei.
O le faavaeina o lenei sootaga (partnership) o se laasaga tāua tele auā o le a mafai ona faaaogāina e fanau lenei avanoa e auai atu ai i faaaoaoga ma tapenapenaga mo a latou taumafaiga uma ina ia fua mai e tusa ma moemitiga o le susuga i le faafeagaiga, le aulotu ma mātua uma aemaise lava o fanau.
E tasi le tausaga o lenei sootaga ma le polokalame, ae o loo iai le naunautaiga e fia faaauau pea pe a tusa ai ma aiaiga ma fuafuaga mo le lumanai.
O le Aoga Faifeau Homework Centre i le EFKS i Magele i Sisifo ua tatalaina aloaia nei ma o le a amata faatinoina lenei aoga i le afiafi o le Aso Lua o le vaiaso nei, aso 5 o Aperila, ma le faamoemoe e faatinoina aoga nei i ni po se lua o vaiaso taitasi.
O le afioga Savea Egelani o le faiaoga taitai lea o le polokalame faatasi ai ma le lagolagosua a le komiti, aemaise le faatāuaina o le pitolaau a mātua o le unaiina mai lea o fanau e faaaogā lenei polokalame maua fua, auā o le isi lea faamamafa o le saunoaga a David, a aunoa ma le lagolago a mātua, o le a faia fua lenei galuega.
Na saunoa foi le afioga i le faipule o Magele, Susuga Su‘a William Sio e faafetaia ai le maelega ma le saili malo o le susuga i le faafeagaiga ia Victor Pouesi aemaise le fingalo na a‘e i le paia ma le mamalu o le aulotu i Magele i Sisifo ona o le taulagalaga i mea lelei auā lava se ‘ai mo fanau e sauniuni ai mo ni taitai iloga o le lumanai.
Na faaiuina le sunoaga a le faipule i lona faapea ane, “Victor o oe lava o le isi toa mo Magele”.
Ia e manatu o le viiga i le Atua ia matuā faateleina, auā a uma ona tatou faia o se mea ua lelei, ona tatou faapea ane lea, “O i tatou lava o ni auauna lē aoga”.