Faaulu i le faamasinoga tagi e 3 moliaga o solitulafono mamafa o le palota

E tolu tagi o moliaga faasolitulafono mamafa na aliali mai i le faiga palota a le atunuu, e ese mai tagi e sefulu o faatosina solitulafono ua faato‘ai i le faamasinoga o faiga palota le Electoral Court.
E lē na o le tulafono o faiga palota e mafai ai ona molita‘i i le faamasinoga ni faiga solitulafono a sui tauva ma a latou komiti. E mafai foi i lalo o le tulafono o soligatulafono matuia ma mamafa, le crimes ordinance act lea o loo mafai ai ona molia se tasi i ni faiga faaalatua, e pei o le taumafai e ave ni tupe poo nisi mea i se isi tagata ma le faamoemoe e faatosina ai lana lagolago.
O tagi o moliaga solitulafono e mafua i le palota ua tuuaia ai le minisita o Leoleo ma Falepuipui, le afioga Sala Fata Pinati i le tuuina atu e lana komiti o se lima sefulu tala i se ulugalii e faatosina ai. O le tagi lea ua faaulu e Tuala Iosefo Ponifasio o le Tautua Samoa. O le moliaga ua faaulu e Moefaauo Lufilufi faasaga ia Alai‘asa Filipo, le faipule o Anoamaa i Sasae i lona tuuina atu o se tasi le afe tala ma le faaupuga e aua ne‘i tuuina atu se tagi o le palota.
I le ma le tagi a le tofa Toluono Feti e na o le 58 palota na ia maua i le faiga filifiliga a le itumalo o Palauli i Sasae faasagai le sui tauva o le HRPP na manumalo, le afioga Afoafouvale John Moors. Ua faaaogā e Toluono sa seei i le tofi o lea itumalo le malosiaga faaletulafono e mafai ai ona faaulu se tasi i moliaga solitulafono ae faaaogā se loia na te finauina le moliaga e aunoa ma le tau avea i leoleo, ma e ta‘ua lea faiga o le private prosecution.
O soo se solitulafono foi e mafai ona faatino ai lea faiga e aunoa ma le tau faia o se tagi mo le suesueina e leoleo. E tasi le moliaga o se gaioiga faaalatua ua autū i ai le tagi a Toluono faasaga i le faipule o Afoafouvale, o loo ta‘ua ai e faapea e $5,000 se tupe na ave e lē ua faasaga i ai le mataupu i se aulotu i le nuu o Fa‘ala o se tasi o afioaga o le itumalo.
O le afioaga foi lea na lagolagoina le faipule ma o loo matai ai foi. Ua faailoa mai e se loia o loo tauaveina le tetee a le faipule i le moliaga, ua sauni e tuuina atu le la mau e teena malosi ai lea tuuaiga, ona o loo iai le talitonuga o le faipule, sa faia lea foai tupe i totonu o le piliota sa faatagaina ai e le tulafono le faia o momoli ma oo. O loo ta‘ua i le mau a le itu tagi sa tuuina atu lea foai tupe i le taimi ua toe o ni vaiaso faia le palota.
O Toluono sa tauva i le fu‘a a le Tautua Samoa, ma o le mae‘a o le faiga palota i le tausaga e 2006 na manumalo ai o ia i le tofi o lona itumalo, ae o lana taumafaiga i le palota o le 2011 e lei toe lagolagoina e tagata o le itumalo o Palauli i Sasae.
O loo iai foi se molimau faatuatuaina ua faailoa mai ai e faapea, o se isi sui tauva o le Tautua Samoa na te lei maua foi le ‘afa o palota a le sui na la tauva ma manumalo, o loo tapena lana tagi e pei o le mataupu a Toluono mo le finauina o faiga faaalatua na faia e le sui na la tauva i le faamasinoga.
O le faamasinoga faaitumalo o le a valaauina ma suesue ai nei mataupu uma e lua a sui a le Tautua Samoa. O loo avanoa foi sui tauva o le HRPP e lei maua le ‘afa o palota a sui na manumalo ona faia lea tulaga, peitai e oo mai ina tuuina atu lenei lipoti mo le faasalalauina, e lē o iloa pe iai ni tagi faapea a sui o le HRPP. O le aso 12 o Aperila o loo faatulaga e valaau ai le mataupu ua faaulu i le faamasinoga e Toluono Feti.