Ua 44 tausaga talu ona ofi atu Pisikoa a Amerika i Samoa, ae o le tautua lava ia i le Lalolagi e atoa i le tausaga lenei le 50 o tausaga. O se tasi lenei o vaega tāua o le ola atia‘e o Samoa o se malo, o se atunuu ma tagatānuu ua fesootai ma tagata fesoasoani nei mai i Amerika.
O le latou sao tele i le unai o a‘oa‘oga i Samoa ua manatua i lenei vaiaso, ae o Iulai i le aso 4, le tutoatasi a Amerika lea ua fuafua e faamanatu faatasi ai i le Lalolagi atoa le 50 o tausaga o le tautua lē faatuaoia a nei tagata mai i Amerika.
Mo Samoa lava ia o Lana Afioga i le Masiofo, o Filifilia Tamasese lea e faauluulu i ai le Polokalame ua faataatia mo le faamanatu ai o le auaunaga a nei foi sui o Amerika mo Samoa. O loo iai se tauvaga ua faatautaia nei ua tausinio faatasi ai tagata Samoa faapea ai ma Pisikoa.
O ai e faagalo le fale pisikoa, se suiga tele i le itu tau i le soifua maloloina na mafai ona laasia ona o tagata Amerika nei sa nonofo i aiga i afioaga eseese ma faamautu ai loa le faaaogāina o fale lē ta‘ua (tulou) ua faaaogā ai le vai ae ua lē na o fale‘eli sa faaaogāina i tausaga e tele ua mavae. Na faaigoa ai lava i nai papalagi nei le fale lē ta‘ua lea sa faaaogā ai kalone vai, o falepisikoa.
O lo latou sao i le atina‘e o a‘oa‘oga a Samoa na vaaia ai le faasoa solo o alii ma tamaitai nei mo le tausaga atoa, o nisi e ta‘i lua tausaga, ae faamautu ai a latou polokalame o le faaleleia o a‘oa‘oga a fanau e pei ona fesoasoani ai i le Ofisa o Aoga. O le faasolo mai ai o le latou tautua, na oo ai lava ina aofia ai ma i latou ua iai le tomai i faatoaga, o le tomai faaonaponei, o i latou e iai tomai i atina‘e o tupulaga talavou, ma nisi e iai tomai i le tulafono, ua faaaogā uma lava auā le fesoasoani ai i Ofisa o le Malo.
O tauvaga ua faatautaia i le faamanatu ai o tausaga e tele ua tautua ai Pisikoa i Samoa, ua aofia ai tusiga tala ma se faaaliga o galuega taulima, ma o le masina lenei e faagata ai uma tusitusiga o nei tauvaga, ae o le aso 4 o le masina o Iulai, e faamanatu ai loa le tutoatasi o Amerika ma faapea ai loa ona tolaulau i latou ua manumalo i nei tauvaga.
O le tausaga foi lenei i lea faamanatuga tāua, o le a faia i le aso e tatala aloaia ai le ofisa ma maota tetele o lea malo ua fausia uma i lona lotoā i Vailima. Ua silia ma le lima tausaga talu ona aveese ofisa o Amerika mai i Vailima ma na muai avane lona ofisa i le Fogafaleono o le Ioane Viliamu i Tamaligi. O lona ofisa lea mo le atunuu e faafaigofie ona fesootai ai ma le ofisa o lea atunuu nai i lo le tau malaga i Vailima.
O Vailima lava ia ua fausia ai nei se isi ofisa aemaise o maota ua faamautu i ai le Sui o Amerika i Samoa atoa ai lana aufaigaluega. O le taimi lenei o le ofisa o le taulaga a lea atunuu ua i le fogafalealuga o le Maota Tele o le Ofisa o Taui mo Faalavelave Faafuasei.
E ese mai i le tauvaga ua faataatia, ua iai foi ni fesoasoani e faaopoopo i lenei aso faamanatu tāua. O le fesoasoani o tusi faitau ua fuafua le Ofisa ma lona sui faalemalo e malaga asiasi atu i aoga laiti i le atunuu e tufatufa i ai. E lei faamautu mai la poo afea o le a faia ai lea asiasiga.
I le va lava ia o Samoa ma Amerika ua tele lava ina taulai fesoasoani e mafai ona ofo mai i le itu tau i atina‘e o faalapotopotoga tuma‘oti, o fesoasoani i femalagaiga atoa ai ma le atina‘e o nuu eseese i Samoa.
O le Afioga i le Masiofo o Filifilia Tamasese o se tamaitai na galue faafaiaoga ma o lona fesootaiga tele lava ma Pisikoa e mai i lana foi auaunaga o le a‘oa‘o o fanau a le atunuu. E mautinoa le tele o tala e maua i le faamanatu ai o nei tagata ma lo latou sao ia Samoa ma lona atina‘e ma o le toatele foi o Pisikoa ua mau paolo ai lava i Samoa, o nisi ua ave o latou faletua poo alii foi na faaipoipo i ai a o galulue i Samoa ma ua faamautu ai i Amerika. O le faamoemoe atonu e oo atu ia Iulai, le aso 4 ua toatele nisi o nei tagata e toe malaga asiasi mai i Samoa mo le faamanatuina o lo latou aso tāua.
