O le fuata ma lona lou, o le taimi foi ma le mea e tupu ai.
O le talitonuga lea ua faamaonia ona o le tele ma le anoanoai o avanoa ua mafai ona maua ma faaaogāina lelei e o tatou tagata Pasefika aemaise lava i le sogasogā ma le soifua tauivi o nai o tatou tamafanau i totonu o matagaluega eseese e pei foi la o lenei faamoemoe ua faavaeina i totonu o Aotearoa nei. O le lua a‘i lenei o tausaga talu ona amataina le polokalame o taaloga a Aoga Amata, ma o se faamoemoe ua talafeagai ma ua fetaui lelei mo fanau laiti i totonu o Aoga Amata.
O le sini ma le anavatau o lenei polokalame o le faamasani, faaa‘oa‘o, faataitai ma ia unaiina fanau lalovaoa o si o tatou atnunuu, ina ia o latou maua le ola lototele, finafinau ma le tauivi i soo se vaega o lo latou ola a‘oa‘oina, ina ia sologa manuia a latou moemitiga mo le lumanai. E lē na o le a‘oa‘oina la i totonu o potuaoga e faatāua ma faamamafaina, ae ua faapena foi i taaloga ina ia paleni lelei foi ma tauiviga auā faiga filifiliga a le tamaitiiti lava ia mo le lumanai.
E tele ni taaloga sa faatinoina e le fanau i lea aso, ma o se mafutaga matagofie i ona itu uma auā sa maitauina le auai ma le lototele, faatino ma le fiafia aemaise o le tatala mai o le loto finafinau o fanau e faatinoina ma faataunuuina ai taaloga sa fuafuaina o le polokalame. Na amataina le faamoemoe i le sauniga lotu na taitaiina e le susuga i le faafeagaia mai Otahuhu, ona faagasolo ai lea o le polokalame a le komiti.
Na mae‘a taaloga ma faia le laugatogi sa tufatufaina ai nai faailoga e tali atu ai i le sagisagi fiafia mai o le fanau ia latou taaloga.
Ia na sola lava Seugagogo Aoga Amata mai Otahuhu ma le mea atoa auā na tele lava ina manumalo nai fanau na faatinoina taaloga mai le latou aoga. Sa faapena foi ona faamalieina ma faafiafiaina uma nai fanau auā o le sini lea, ia lē gata ina taaalo manumalo ae ia sili ona iloa e le fanau ona taaalo fiafia ma maua ai le mafutaga ma isi tamaiti mai isi aoga.
O le lagona ina ia faaauau pea lenei polokalame lelei ma le talitonuga, o le a mafai ona auai mai i ai isi Aoga Amata i le lumanai.
