E lē o mautinoa i le taimi nei pe ua toafia nisi ua maliliu ma maimau soifua i le mafuie, mulimuli ane ai ma le sunami matautia ua mafatia ai nei nai o tatou uso a tagata i Iapani.
O le tea o le fitu i le afiafi o le Aso Faraile na tea nei, taimi Niu Sila, na uluai maua ai e le Radio Samoa se lipoti tuusa‘o mai Iapani, i se tasi o tamafanau Samoa o loo alaala ai.
O le mafuie e tusa lona malosi ma le 8.9 i le fua mafuie, sa faatamaia ai se vaega o le atunuu o Iapani. O se vaaiga matautia sa maitauina i luga o televise i nisi o lipoti faapitoa sa tuusa‘o mai ai.
O le tamalii Samoa sa valaau mai Iapani, na vave ai ona silafia e le mamalu o le atunuu i Niu Sila, e lē taumate e faapena foi nisi o atunuu o le lalolagi, ona o fesootaiga i luga o le initaneti, ma faasalalauga a le Radio Samoa o loo maua mai ai.
O le mea mautinoa lava e fai si toatele o nisi ua maliliu, faapea nisi o loo manunu‘a ai ona o lea foi faalavelave matautia.
O Iapani e tusa ai ma talitonuga ma sailiga a saienitisi, e mautinoa lava le faaletonu tele o lona tulaga ma lona faavae.
O loo molimauina i faamaumauga a saienitisi, le matautia ma le lamatia ai o Iapani ona o fesootaiga o ipu poo papa mafolafola i le manava o le eleele e mafua ai mafuie.
O le faaiuga lava foi o le vaiaso na toe foi ai ma toe taliu le vaega‘au a Iapani, sa iai i Niu Sila nei, ona o le fia faaoo mai o sa latou fesoasoani i mafatiaga sa feagai ai foi ma Kalaiesetete ona o le mafuie i le aso 22 o Fepuari.
Sa mautinoa lava e tusa ai ma se faatalanoaga a le taitai o le vaega‘au mo le saogalemu sa i Niu Sila, ma le televise tolu a Niu Sila, sa ta‘ua ai e iai nisi o lea vaega‘au, o loo aafia ni o latou aiga i le mafuie i Iapani. O se tulaga sa faanoanoa tele ai.
Ia manatua pea le tulaga faigata ua iai nei le lalolagi i lenei vaitaimi.
E manatu o se fafagu tāua, mo soo se tasi lava ina ia manatua ma sauni pea i soo se taimi e oo mai ai mala faalenatura, auā ua lē alofia i soo se vaega o le lalolagi.
Manatua Iapani i au tatalo.
