O le faamati e pei ona lausilafia i totonu o le galuega ale EFKS, o le iloiloina o galuega tausi ma tiute tauave e patino i le mafutaga a tinā, auā le faaleleia o le lotoifale poo le itu i le tino o le galuega.
E silasila foi le afioga i le Tiakno Toeaina ma lona faletua i itu talafeagai mo le faamatagofieina lava e lē gata i lona itu i fafo ma totonu o maota tapuai, ae ao foi ona vailiiliina vaega o manaomia i totonu o maota o galuega o loo alaala ai le aufaigaluega faafeagaiga ma toe teuteu atili nisi vaega o faaletonu.
O vaega uma ia e atagia ai le soifua faatuatua o le tagata e faaailoa atu ai i le Atua lana auaunaga e ala i le ofoina o le foai ma le loto malie.
I le faagasolo mai ai o le faamati o lenei tausaga na uluai amataina i le pulega a Saute, faamoemoe o le vaiaso fou e asiasi ai le Pulega a Sisifo, faasolo atu ai i le Pulega a Matu, taualuga i Townsville ma Cairns.
O le taeao segisegi i le ta o le 6, na lei alo tamala ai le Pulega a Saute i le tapenaina o le ‘ava o feiloaiga poo le alii taeao, na usu faaaloaloa ai le Pulega auā le uluai faamati a le afioga i le Tiakono Toeaina ma lona faletua, susuga ia Su‘a Vasa ma le faletua ia Faamomoi Su‘a.
Sa vaaia le taupati ma le sagisagi atu o tulafale ma tamalii aemaise ai le paia ma le mamalu o le aufaigaluega a le Atua e opogi le faamoemoe.
Na mae‘a le ‘ava usu ona alo lea i le mālū taeao na saunia e le ekalesia a Southwest (Rev Tauaana & Senerita Mataafa, toeaina taitai o l e Pulega a Saute ma le mafutaga a Tinā) auā o le susuga i le toeaina ma le faletua faapea le afioga i le Tiakono Toeaina & faletua ma le mamalu o le aufaigaluega ma le loaloa o le pulega, ma amataina loa polokalame fuafuaina o le aso.
E lē mafaamatalaina le felanulanuai ma le matagofie o tapenaga a Ekalesia taitasi ma mafutaga a Tina, auā sa faia le mea silisili na gata ai le taumafai.
E lua pasi na faaaogāina ona o le toatele o le mafutaga a Tinā o le Pulega, o iinā e molimauina ai le tupu ma le ola o le galuega.
E ui ina pogia le asiasiga, peitai na lagona le agaga fiafia o le Mafutaga a Tina atoa e faatino o latou tiute masani ona o le tautua matavela ile galuega ale Matai.
E sefulu aulotu sa asia ile Aso Toonai aso 5 o Mati e pei ona faasavali ai le asiasiga.
O le malu ifo o le afiafi pe ua tusa o le lata i le 6, na to‘ulu uaga o faamanuiaga ae faato‘ā taunuu le asiasiga a le faamati i le ekalesia mulimuli (Rev Petaia &Sarai Tu’ifao ma le mafutaga a Tina Southside).
Na taualuga faigamea i le taumafataga tele sa potopoto ai le pulega i le Tiafau Hall a le susuga i le toeaina taitai, na pei ai e fofoe faavi atu se vaivai i le felanulanuai o taumafa sa kukaina e le susuga ia Tui ma Rachael Vaimoso o le Paradise Roast faapea le lagolago a aulotu taitasi.
O le viiga ma le faafetai ile Atua ina ua tini lau ole faamoemoe sa lupe ma taupoina o le faamati o lenei tausaga, ua faaiuina ai ma le manuia.
O le tatalo a faafeagaiga ina ia saga sasaa ua o faamanuiaga i le soifua galulue o tagata ua ofoina mo lona finagalo.
