O miti ma moomooga a Samoa ma lana tapuaiga ia manumalo le alo o le atunuu i lana fusuaga i le Aso Sa ma le siamupini o le lalolagi ia Wladmir Klitschko aemaise lava i le taimi na sau ai i totonu o le maea lea na muamua ili le foafoa e se sui o lana aumalaga faaemo mai ai ma le ata o ‘alii tau’ totoa i se faamata‘u ma se lui mo le siamupini.
Na atili faagaeetia le tapuaiga a soo se Samoa i le lalolagi i le mo‘emo‘e mai totonu o Alex i le pese ‘Samoa Matalasi’. Ae peitai i le ogatotonu o le taamailosaga muamua na maua lelei ai i se osofaiga vavave a le Ukraine ma faitau ai upu.
Na iloa i lea taimi le faigata o le galuega o loo feagai ma Leapai auā e uma taamilosaga e fā o taumafai e sao atu i totonu o Klitschko ma osofai pui manava ma se avanoa i lona auvae ae matautia le lelei o le puipui a le saimupini.
E aunoa ma se tu‘i malosi na sao atu ia Wladmir auā o se alii ua atoa le sefulu tausaga o siamupini ma ua lava le tomai e ‘alo ai ma solasola mai paga pupuu e pei o Alex. E oo lava i alii faasalalau na o latou saunoa i le taamilosaga muamua e lē umi le fusuaga auā na vave tigaina le alo o Samoa lea na fusu mo Ausetalia ma Niu Sila foi.
Pau le upu na gagana ai le aufaasalalau mai Siamani mo Leapai, o le lototele ma le toa i le taimi o sauaga a le siamupini. O taimi uma lava e faa‘emo mai ai (slow motion) taimi e lavea ai Leapai i tu‘i ma so‘a a le Ukraine na atagia ai le mamafa o lima o Klitschko.
O le faigata lava o le pipii atu o le Lion Heart i lana paga auā o le atamai o lenei alii umi ma le maualuga e so‘a ma faatautu‘i e vala ai na avea ma itu faigata ma o le taamilosaga lona lima na taumafai ai loa Leapai e tu‘i oso lana paga ae lavea ai loa ma faitau lona lua ai upu.
O le toe amatalia o le paga pe toe minute o totoe na toe faatautu‘i ai loa e Wladmir si alo o Samoa ma palasi atu ai loa i le ta‘ele o le maea ma uma ai loa ma le fusuaga.
Atonu o le taimi lea na lagona uma ai e soo se Samoa i le lalolagi le faanoanoa auā o le sini o le faamoemoe sa fia silasila i ai o le siamupini o Lion Heart. Aepeitai o se fusuaga na faatoa maimoa ai le toatele o le atunuu i le agavaa ua mafua ai le mau uma o fusi e fā o le lalolagi i lenei alii.
O se tagata foi e tamalii ma tausaafia lana taalo ma sa vaaia lava lona faamaise ia Alex Lion Heart Leapai i le mae‘a o le fusuaga. Sa lē mafai na auai ane Alex i le taimi na sii ai le aao o Klitschko e le laufali, ma ua toe mau ai le siamupini o le lalolagi; ae i lana saunoaga, “O le a ou toe foi i le laupapa e faasa‘o nisi o mea na faaletonu ma o le a ou toe taliu mai i se taimi o i luma.”
