Ua taatia atu nei i le afioga i le Faamasino, Vaepule Alo Vaemoa Vaai, folasaga a loia mo le afioga i le Sui palemia, Fonotoe Nuafesili Pierre Lauofo, ma le minisita lagolago le afioga Muagututagata Peter Ah Him, e faia i ai sana iloiloga ma sana faaiuga i moliaga o ia minisita o le Malo ua faamaonia.
O lanu matagofie felanulanuai o tofi o loo umia e Fonotoe ma Muagututagata sa faailoa e loia ia la folasaga. E lē gata o ni tamalii o loo umia tofi maualuluga o le Malo, ae o ni tagata foi e aloaia o la tulaga i le atunuu.
Na faaalia e le alii loia le susuga Patrick Fepuleai o loo tulai mo Muagututagata, o fonotaga e auai le minisita lagolago e lē gata i Samoa ma atunuu i fafo e tāua ai le silasila o le faamasinoga i le vaega 104 o le Tulafono o soligatulafono le Criminal Procedure Act, lea o loo avanoa ai ona soloia se faamaoniga o se solitulafono e aunoa ma se faasalaga (discharge without a conviction).
O le isi itu na faaalia e le alii loia e tāua ai le silasila i lea vaega o le tulafono, ona o fono faavaomalo e malaga ai le minisita lagolago, e faatumu pepa o femalaga‘iga lea o loo iai le fesili pe sa faamaonia se solitulafono.
Faaalia e le loia afai e tumau pea le faamaoniga o solitulafono o Muagututagata o le taimi lava e iloa ai i le pepa faatumu o le a iai nisi tulaga e tulai mai ma aafia ai lona tulaga mamalu o se faipule o le Malo o Samoa.
E faapena foi se folasaga a le alii loia le susuga Donald Kerslake na folasia i le faamasinoga. O le tulaga loia o le Sui palemia e ono toe faia i ai ni moliaga e le sosaiete a loia i Samoa. O le isi itu o ona tiute faalemalo o le a matuā aafia i le faamaoniga o lona moliaga e pei ona iai se faaiuga a le faamasinoga.
Na faaleo e le alii loia e faapea, e ui o le moliaga o le faalavelave i le tiute o leoleo e tasi le tausaga i le falepuipui le faasalaga, ae o le gaioiga na faia e Fonotoe e lē tutusa ma le solitulafono o le faaoolima e aafia ai se tagata.
Peitai na fesili le alii faamasino o Vaepule i le alii loia, poo le ā sona silafia i le moliaga o le faalavelave i le tiute o leoleo na faia e le Sui palemia ma lona tulaga o se taitai maualuga o le Malo, sa lē tatau ona ia faia se faataitaiga lē lelei mo isi.
Sa ioe le alii loia ae na faamalulu i le faamasinoga ona o lana folasaga na afea ai le solitulafono o le faaoolima ma faatusatusa i le moliaga o Fonotoe, ona e lei afaina se tagata i le gaioiga na faia e le Sui palemia.
O finauga ua tuuina atu o le a fua i ai se faaiuga mo le Sui palemia ma lana minisita lagolago pe a fofogaina le iuga o le mataupu i le aso 13 o Me 2013. O le moliaga o Fonotoe o lona faasalaga e tasi le tausaga i le falepuipui poo se sala tupe.
O le moliaga o Muagutagata o le lē usitaia o aiaiga o le tulafono i le faaaogāina o le masini mānava e iloa ai le maualuga o le ‘ava malosi, e sala tupe e lima sefulu tala. Peitai o le faasalaga o le isi ona moliaga o le faalavelave i tiute o leoleo e tasi le tausaga i le falepuipui poo se sala tupe.
