E ui ina sa tele matematega ma faia foi faatusatusaga a le toatele i le itumalo ua tatau ona ave i ai le tofi minisita o le kapeneta, peitai o lea ua manino le mata o le vai i le filifiliga a le afioga i le Palemia, Susuga Tuilaepa L Sailele Malielegaoi, ua tusi aao i le faipule o Satupaitea le afioga Lautafi Fio Selafi Purcell e avea ma minisita fou.
Ua sui tulaga o ia i le afioga Faumuina Tiatia Faaolatane Liuga, sa avea ma minisita o tupe ae ua faamavae.
O le filifiliga lenei ua mautu ai ma matematega a nisi e ono toe fetuunai pe reshuffle tofiga o le kapeneta, e pei ona faailoa e le Palemia o ia o le a toe foi e umia le minisita o tupe sa ia umia i le silia i le lua sefulu tausaga i le taitaiga a le afioga Tofilau Eti Alesana sa avea ma Palemia o le atunuu i tausaga ua tuanai.
Peitai o matagaluega uma ma faalapotopotoga sa tauaveina e le Palemia o le a faamatuu ese ma ua i lalo o le vaaiga a le minisita fou ia Lautafi. O matagaluega ia e pei o le Komisi e pulea tagata faigaluega a le Malo le PSC, Ofisa o numera faamaumauina, Faalapotopotoga o eleele a Samoa, le pulega o malae taaalo ma taaloga, ma le Faalapotopotoga o Fale le Housing Corporation.
Ua avea foi Lautafi ma minisita o le matagaluega fou ua faatūina e le Malo, le matagaluega lea ua ta‘ua o le Public Enterprises sa i le vaaiga a le matagaluega o tupe. O se matagaluega na faaalia e le Palemia o le a agai i le sailia o le mau miliona o tupe mai pisinisi ma faalapotopotoga tuma‘oti. Faaalia e Tuilaepa o le toe filifilia o se faipule mai Savaii e avea ma minisita, o le faaauau ai lea o le tofiga sa umia e le sui faipule o Palauli le Falefa.
O le sauniga na faalauiloa ai le minisita fou na faapea foi ona faasilasila ai e le Palemia le toe faaa‘e ai ma le tofiga minisita lagolago o le faipule o Alataua i Sisifo le tofa Lafaitele Patrick Leiataualesa. Sa faamalolo lē tumau pe suspend le tofi minisita lagolago o lea faipule ona o se mataupu na aafia ai i ni ana lafoga na atagia ai lona lē tausisia o amioga taualoa a sui mamalu o le Palemene faapea minisita lagolago a le Malo.
Na faatauto ai foi ma Lafaitele i luma o lana afioga i le Ao o le Malo ma le Faamasino sili. Sa auai minisita o le Kapeneta, minisita lagolago ma faipule o le Itu Agai aemaise le mamalu o faauluuluga o Matagaluega ma Faalapotopotoga a le Malo.
O le umia e le Palemia o le matagaluega o le Tupe ua tele ai lona avanoa e faatino isi tiute tāua o le Malo i lona tulaga o le Palemia o le atunuu.
