O le ulugalii a le alii lakapi lauiloa o Samoa le afioga Muliagatele Brian Lima ma le tamaitai, le afioga Lemalu Sina Retzlaff, ua faamuta e le faamasinoga ina ua faia se teteaga poo se divorce i le tausaga e 2011.
O le faamatalaga lea a le tamaitai le afioga Lemalu i le faamasinoga ina ua faia lana molimau e lagolago ai lana tagi faasaga i lē sa avea ma ana tane faaipoipo lea e toatolu o laua alo tama laiti.
O Tesema o le tausaga ua mavae 2013 sa auai Lemalu i se faatasiga i le Iunivesite Aoao a Samoa lea na ia faamatala sa faia ai se fiafia sa inu ai ni ana ipu uaina.
Na momoli i ai e lana uo tama le alii o Sialofi, ae na toe alu atu piki mai i le afiafi po ma la agai ai loa i se evaga poo se tafaoga i le fale kalapu o le Ynot i Matautu-tai. Na faaauau atu le la tafaoga i le isi fale kalapu ma le fale‘aiga o loo sosoo ma le Ynot le Paddles, seia oo ina toe faaiu ane i le Ynot le evaga ma la tuua ai loa le nofoaga poo ua tea le 12 o le vaeluaga o le po o le aso 12 o Tesemaa 2013.
“Na ma feosofi ma Sialofi i le ma taavale, o a‘u sa i le nofoa o le pasese a o Lofi na i le nofoa o le avetaavale”. Na molimau Lemalu e lei o ese ma le nofoaga e tutū ai taavale o le fale kalapu poo le car park, ae vaaia loa le agai atu o le taavale a Muliagatele Brian, ua paka i le isi itu ma savali atu loa.
“Na ou manao e faatali e aua ma te o ese se‘i sau pe iai se mea o manao ai”. “Na fesili mai Brian poo ā mai tamaiti, ou fai atu o loo i Ululoloa i le ma fale. Ona fai mai lea poo la‘u uo lea o loo ma tafafao ma ou fai atu i ai e sa‘o. Na faamatala lava le molimau a le tina, na oo talanoaga i se tala a Muliagatele na fesili atu ai, “ So you’re f…. this man on our bed”…Na ou te‘i ma ou fai atu i ai, what bed ?..”
Fai mai le molimau a Lemalu o le taimi lea na ia faalogoina ai le tau o se tu‘i a lē o loo molia i lona mata taumatau ma ia faalogoina le tafe o le palapala poo le toto ua lilofia ai ona foliga. Na tagi ma faataiō ma valaau mo se fesoasoani a o le taimi lea o loo taumafai Lofi e vaovao Brian. Na oo ifo le vaovaoga i tua o le taavale ma mamulu ese ai Brian ma toe alu atu faaoolima i le itu tauagavale o ona foliga.
A o tupu lava le vevesi na mafai ona maua e Lemalu le avanoa e saofai ai i le nofoa o le avetaavale o lana taavale ma ia maua ai le ki o loo mau ai pea. Na la o ese vave loa ma Lofi (e pei ona ia faapuupuu ai le igoa o lana uo).
Na oo atu i luma o le faletalimalo o Aggies i Vaisigano ae na faasalavei ane le taavale a Muliagatele, ma solomuli ai i tua le la taavale ma agai loa i Vini i se tasi o ona aiga lea na maua ai le fesoasoani na ave ai o ia i le falemai.
O le Aso Tofi na amata ai le faamasinoga seia oo mai i le Aso Faraile na tea nei lea ua mae‘a molimau a leoleo. E fitu moliaga o Muliagatele Brian Lima e pei o moliaga o le faaoolima, faaoomanu‘a, lafo o upu tau faamata‘u, ma le umia o se a‘upega matautia.
O le aso fitu o Me lea ua tolopo i ai le mataupu ma o le a valaau ai molimau a le itu tetee. O le afioga i le tamaitai faamasino o Ida Malosi o loo tauaveina lenei mataupu i le faamasinoga maualuga.
