Na mataina le manumalo o le alii Samoa ia Joseph Parker i fusuaga amata i le po na taualuga i le fetauiga a Leapai ma Klitschko. O le alii Brazil e 33 tausaga ia Marcello Nascimento lea ua loa tausaga o fusu 22 fusuaga,17 manumalo,15 tu‘ioti, 5 fai‘aina na toatele nisi e manatu e ono manumalo ia Parker lea faatoa 22 tausaga, 7 fusuaga, 7 manumalo, 6 tu‘ioti.
E ui o le umi ma maualuga o le alii Brazil ia Nascimento na vaaia le lavea i osofaiga a Joseph Parker mai le taamilosaga amata lea na faitau ai upu a le alii Brazil. Sa atagia ai i lea taimi le lelei o le faafoeina e Joseph Parker o le fusuaga ma sa manumalo lava i le tele o taamilosaga i le sao lelei o ana faasolo pulu ma afaina ai Marcello.
Na lē faavaivai foi lenei alii ua loa na fusu faapolofesa ma sa vaaia le malolosi o ana auato ma so‘a tu‘i sa faapopoleina ai le alo o Samoa i le taamilosaga ono lea sa vaaia ai loa le manu‘a o le muaulu o Parker ma maligi mai ai le toto.
Sa faapea foi i taliga sa vaaia le sau o le palapala i le malolosi o aao o le alii Brazil, ae ina ua tea le nenefu ma le i o taliga o Joseph Parker na toe maua mai ai lona malosi i le taamilosaga fitu ma ia osofai malosi ai ma ‘ai lelei ana faatautu‘i ma pogisa ai Marcello ma atoa le 20 sekone o tasasa solo ma amoki e le alo o Samoa ae na o le punou ua lavea tigaina ma taofia ai loa e le laufali le fusuaga i le taamilosaga fitu.
O se manumalo mataina i le fusi o le WBA Pan Asia Heavyweight i le paga mamafa ma o se taimi muamua foi lea ua fusu ai Parker i se fusuaga tele ma toatele nisi o maimoaina i le lalolagi atoa. O le alii faiaoga ia Kevin Barry o loo avea ma ana faatonu ma o lenei manumalo ua siitia ai lana matatia fou i le 8 fusuaga faapolofesa, 8 manumalo 7 tu‘ioti.
O se alii e tau maualuga atu lona fuaitino na i lo o Tua ma Leapai, ma atonu o le a tele foi sona sao i lea faagatama i le lumanai auā o lea faatoa 22 tausaga ae ua faia‘ina ai le 33 tausaga ua 22 fusuga faapolofesa.
