Ua faamaonia mai e le kovana o fusuaga a tamaitai a Niu Sila, Bob Lyall le filifilia o le alo o Samoa, le tamaitai o Magan Maka, e fai ma sui o Niu Sila mo taaloga a le Oceania o le a faia i Canberra i Ausetalia, atoa ai ma le suegasiamupini a le Lalolagi o le a faia i Barbados.
O Magan Maka o le Samoa lona tina a o le Tonga lona tamā, ma o se tamaitai talavou sa maoae lona tomai i le taaloga o faipelega i taimi uma lava sa amata mai ai lona taumafai. Ua leva ona taalo Magan i taaloga faalotoifale i Niu Sila, ma o loo ia umia pea ni siamupini mai ia taamilosaga, aemaise ai se vaega o taamilosaga faavaomalo a le lalolagi.
O le taaloga talu ai nei a lea alo o le atunuu, sa faatinoina i le taamilosaga sa tuufaatasia e le susuga ia Tuigamala Vaaiga ma lana faletaalo i le tausaga nei. O Magan e lē na o le taaloga faipele e agavaa ai, ae e iai foi i totonu o ‘au filiffilia faaitumalo a le itu i matu i le taaloga o le lakapi.
Faaalia e le kovana o faipelega a Niu Sila, lona fiafia tele i le tulai mai o lenei foi tamaitai Pasefika e tauavea le igoa o Niu Sila, mo taaloga tetele faapea i le va ma isi atunuu o le lalolagi.
Se vaaiga i le tulaga maualuga ma faamaumauga i le taumafai o le tamaitai o Magan Maka i tausaga ua mavae e oo mai i le taimi nei:
Auckland Champion 2005-2009 (Junior & Senior)
North Island Golden Gloves 2006-2009 (Junior & Senior)
New Zealand Championship 2007 runner-up (Senior). O ia e pito laititi i le vaega matutua i le 13 tausaga.
New Zealand Championships 2009 (lalo ifo o le 70kilo.)
New Zealand Golden Gloves 2009 (lalo ifo o le 70 kilo.)
Tongan Championships 2007-2009 (69kilo & 80kilo)
North Island Golden Gloves 2010 runner-up (Senior)
New Zealand Women’s Trial 2010 winner
O le aso lima e oo atu i le aso valu o Aukuso o le tausaga nei e faia ai taaloga a le Oceania i Canberra i Ausetalia, a o le aso 7 e oo atu i le aso 19 o Setema o le tausaga nei lava foi e amata ai le taaloga o le siamupini a le lalolagi i Barbados.
E toaiva ia Magan nisi o tamaitai Niu Sila sa tausinio mo le faamoemoe e tauavea le fu‘a a Niu Sila mo taaloga ma taamilosaga e pei ona faailo mai. O tamaitai e toaiva o loo iai i le autaalo mo faipelega i le 2010 a Niu Sila, ua sauni e malaga atu mo le faamoemoe i aso ma taimi e pei ona atofaina.
O se tasi lenei o taaloga o loo matuā talenia ma agavaa ai tagata Samoa i soo se itu lava o le lalolagi o loo aumau ma nonofo ai. E lē gata i tagata Samoa ae faapea foi le motu o Tonga. Atonu o le isi malosi lilo lea o loo maua e le tamaitai o Magan, ona ua tuufaatasi uma i ai le malosi o Samoa ma le paoa o Tonga. Ia talosia ina ia manuia le taaloga a lea foi alo o le atunuu ua sauni atu i ai.
