Ua toe taliu i fanua le aufusu faapolofesa a Fiti sa auai i fusuaga i Apia i le po o le Aso Tofi ua mavae. Manumalo Iosia Nanai o Falelatai ma Savaia i Lefaga ia Meli Vutevute o Fiti o le aupaga ‘super middleweight’ ina ua taofia e le laufali le fusuaga i le taamilosaga lima o le fusuaga ono taamilosaga.
O le aupaga ‘light heavyweight’ na fetaui ai Warren Fuiava o Fa‘ala Palauli ma Lalomalava ma Jovesa Vaileba o Fiti, lea na taofia ai foi e le laufali le fusuaga i le taamilosaga tolu ina ua lē mafaia e Jovesa ona faaauau le fusuaga.
O Pele Faumui o Fa‘ala Palauli ma Lalomalava i le aupaga o le ‘middleweight’ na fetaui ma Abhay Chand lea na auau faatasi faamasino e tuuina atu le manumalo ia Pele o Samoa. O le faalua ai lea ona fetaui o Pele ma Abhay. O le la uluai fusuaga sa faia i Suva i Fiti na manunalo ai Pele i ‘ai, lea foi ua toe taaalo e lē o ea lava le toilalo o le siamupini o Fiti i le siamupini o Samoa.
O paga faaopopo faapolofesa o le Samoa Pro Am Fights na fetaui ai Opetaia Mika Tui o Fa‘ala ma Asau i le aupaga mamafa ma Gogosina Ulutoa o Samatau ma Salamumu. Sa tuuina atu le manumalo e faamasino ia Opetaia peitai ua tuuina atu nei le talosaga a le pulega o fusuaga i le asosi o fusuaga faapolofesa a Samoa, mo le toe iloiloina o lea faaiuga ona e faalua ona pa‘ū i lalo Opetai ina ua lavea lelei i pomu a Gogosina. O le tagata o le a faamaonia le manumalo o le a ia lu‘iina loa i le tausaga fou le fusi o le siamupini o Samoa o loo ia Seiaute Mailata o Afega ma Avao.
O le isi paga i le aupaga mamafa na fetaui ai Sipaia Fouvale o Lalovaea ma Luma Aifaalua o Lefagaoalii ma Foaluga, lea na tuuina atu e faamasino le manumalo ia Sipaia.
O le aupaga ‘cruiserweight’ na fetaui ai Saipeti Muga Asiata o Vaiusu ma Safotu ma Alapati Kitiona o Paia ma Saleaumua, lea na auau faatasi faamasino e tuuina atu le manumalo ia Alapati. Peitai ua tuuina atu foi le talosaga mo le toe iloiloina o le faaiuga.
O le paga a Ualesi Ionatana o Safune ma Asau ma Francis Mamoe o Vaiusu ma Toamua i le aupaga ‘cruiserweight’ na taofia e le laufali ina ua lavea lelei Ualesi ma pa‘ū ai i lalo.
O le paga ‘welterweight’ na fetaui ai Ionatana Pula o Tanugamanono ma Michael Fonoti o Falealii ma Manunu lea foi na taofia e le laufali ina ua lē mafai e Ionatana ona faaauauina le fusuaga ina ua afaina lona tauau.
O le taualuga o le po i le paga faapitoa na fetaui ai Alema Vaele o Vaimea ma Too Mita‘i o Faleasiu ma Safa‘i i le fusi o le siamupini o Samoa i le aupaga ‘super middleweight’ i le sefulu taamilosaga.
Sa ave uma e Too taamiosaga muamua e lua o le fusuaga peitai o le taamilosaga e tolu na sui ai loa le tulaga o le taaloga ma i‘u ai ina taofia e le laufali ma tuuina atu le manumalo ia Alema.
