O le vaiaso ua tuanai na faataunuuina ai le Pacific Fono (research), e tapa ai ni finagalo o tagata Pasefika uma o loo faatautaia faasalaluga tau leitio, TV Pasefika, NiuFM, faapea ituaiga fesootaiga tau media eseese, e uiga i ni suiga ma ni tulaga e lē o lelei auā le alualu i luma o faasalalauga tau Pasefika i totonu o Niu Sila.
O lea fonotaga sa faia i le Trust Bank Lounge i Hagley Park ma e toalua ni alii o komiti filifilia, Holona Lui (Niue) ma Sai Lealea (Fiti) galulue faakonekarate mo le NZ On Air na malaga mai mo le faamaopoopoina o lea itu.
Manatua foi o le NZ on Air lea o loo sau ai le alagatupe fesoasoani mo Leitio ma televise pei o le Access, NiuFM ma le Tagata Pasefika.
Na tatala foi avanoa mo tagata lautele faalogologo e tapa ni o latou finagalo a o faafofoga ai i polokalame leitio faasalalau ma le televise, e pei ona amatalia mai Aukilani, Ueligitone lea ua faaiu mai Kalaiesetete.
E toagaogao lava na auai ma foliga mai e lē faatāuaina e tatou tagata Pasefika lenei faatalanoaga, peitai sa auai le pule sili o le Plains FM Access Radio (Nicki Reece), faapea le faatonu polokalame, Lau Samoa Matalasi, Faletuai Isaako, ma le sui o le Siufofoga Penina o Samoa, faapea Sia, le Faatonu o le polokalame Leitio Toga.
Tele mataupu anoa na talanoaina e pei o fundings o loo maua mai le malo ma lona faasoaina, atoa ma airtime ia faatulagaina lelei, aemaise le toe tagai i le faaleleia o le quality o polokalame.
Sa faaalia le mataupu i auaunaga leai se totogi a volunteers lea o loo ofoina o latou taimi se’i fai i ai se fuafuaga faapea taimi faatulagaina o le polokalame Tagata Pasefika ua lē talafeagai le taimi o le po.
Nisi o mataupu sa tilotilo le fono i ni auala manaomia e tagata Pasefika mo le faaleleia o itu tau leitio, fesiligia foi le leitio Pasefika mo Niu Sila atoa (NiuFM), foliga mai e pei o se leitio pulea e Aukilani, ao fea o iai faataatiaga na leva ona pasia tausaga ua mavae o le faia o ni lala i Ueligitone ma Kalaiesetete?
Peitai sa faaalia manino mai e le komiti, e misi atoa ona o mataupu lava faapolokiki, ae onomea ona toe taulagalaga ma faamanatu, pau le la galuega o le faamaopoopo o finagalo ona lafo lea i le komiti autu.
Ae talosia ia, pe na o le avatu foi o lagona ma salusalu i lalo o le kapeta seia afea? Ae lelei ona tagai i le tuatusi lea o le upega tafailagi e faatumu ma faaalia ai lou finagalo mo i latou e lei auai: Pacific Broadcasting Audience Survey.
