E lē faigofie pe taugofie le osiga o se feagaiga i le va o i laua ua filifilia e tuufaatasia i le tino e tasi.
E a‘e i mauga, ifo i vanu e lutia foi i puapuaga ma le tele o le seleni e faaalu, peitai e faamaoni lava upu o le Tusi o le Ola, o puapuaga e tupu ai le onosai, o le onosai lena e faaeaina ma tini ai le taufetuliga i le manuia.
O le Aso Toonai, aso 19 o Novema sa faapaiaina ai le susuga Richard Jim-Bone ma le tamaitai o Piilua Nai, i le sauniga o le faaipoipoga.
O se sauniga matagofie sa molimauina ai le agalelei o le Atua, e ala i le taitaiga a le Agaga Paia.
O le tuaa lava o le tamaitai faaipoipo sa taitaia le sauniga, le susuga i le faafeagaiga ia Ps Manuula Nai o le Ekalesia Faapotopotoga a le Atua (AOG) i le pitonuu o Kingston.
O Ps Tupou Afamasaga na tatalaina le sauniga i le tatalo, a o Ps Mulaulau Uili na saunia le tatalo e faamanuia ai le ulugalii faaipoipo, ona saunoa lea o Ps Manuula Nai i se upu e tomatauina ai le aiga fou.
Na molimauina le toatele o aiga o le alii o Richard faapea le tamaitai o Piilua na latou lagolagoina lo laua faamoemoe, aemaise ai le aiga o le Atua.
Na malaga mai nisi i Niu Sila ona o le fia auai mai i le aso fiafia o le alii ma le tamaitai faaipoipo.
O le susuga ia Teva Nai sa fai ma fofoga o le aso. Na matuā lologo faa-Tutuila le auvalaaulia ona o le talenia tele o le alii MC, e lē gata i tulaga tau faasalalau ae o lona siufofoga malie i tulaga tau musika.
Na felanulanuai le taumafataga na tapenaina e aiga galua sa tali ai le sua a le auvalaaulia, o le ‘auga lea o le aso i le auvalaaulia, faapea foi se fofoga taumafa mo le aufaigaluega a le Atua ma o latou faletua. Na alo foi aiganalua auā foi faaaloaloga masani, mo aso faapenei, o le tofa ia Faatili Autufaga na malaga mai i Niu Sila sa tu i le tootoo auā le agatonuina o le paia i le auvalaaulia faapea foi se faafetai i le aufaigaluega a le Atua, aemaise le ekalesia.
Na to‘ia le aufaigaluega a le Atua faapea le ekalesia e ala i le titilavatoa ma le faaaloalo maualuga, na masui ma maamaau i ai aiga galua ona o pelega o fanau ina ia maua e le aiga fou manuia o le Atua.
O le fofoga o le ekalesia, le Susuga ia Lami Seala Pisa na saunoa e momoli se faafetai i aiganalua, ona o fua o faaaloaloa ma fua malō sa tau aao i ai i lea aso.
O le susuga i le alii faaipoipo ia Richard Jim-Bone e sau mai le alalafaga o Asau i Savaii a o le tamaitai faaipoipo ia Piilua Nai e mai le alalafaga o Matautu i Falealili ma Fagaloa i Aleipata.
O upu a Solomona e faapea,”E tuuina a‘u i lou loto e faapei o se faamaufaailoga i lou lima, auā ua malosi le alofa e pei o le oti”. Ia manuia le ulugalii fou.